Кэбээйи нэһилиэгэр “ТАБЫС” ыччат бэстибээлин чэрчитинэн Григорий Кобяков аатынан улуустааҕы библиотекаҕа Төрүччүнү үөрэтиигэ семинар ыытылынна.
Ыҥырыылаах ыалдьыттарынан СӨ хотугу норуоттар этнологияларын чинчийэр уопсастыбаннай институтун салайааччы Константин Ильич Аргунов уонна ыаллыы сытар Горнай улууһун Атамай нэһилиэгин делегацията буоллулар.
Мустубут дьону кытта, чуолаан, дьиэ кэргэн төрүччүтүн электроннай архыыбын оҥоруу тула кэпсэтии барда.
Константин Ильич республикаҕа төрүччүнү үөрэтиигэ ханнык үлэ ыытылларын, инники былааннары билиһиннэрдэ. Горнай улууҺун библиотекаларыгар былааннаах, биир ситимнээх үлэ ыытылларын сырдатта. Хас биирдии улууска, нэһилиэккэ библиотекалар төрүччүнү үөрэтии, оҥоруу кииннэринэн буолуохтаахтар, библиотекардар бу хайысхаҕа краевед, научнай үлэһит быһыытынан үлэлиэхтээхтэр диэн бэлиэтээтэ.
Атамай нэҺилиэгин аҕа баһылыгын солбуйааччыта Николай Юрьевич Павлов төрүччүнү үөрэтиигэ нэһилиэгин уопутун кэпсээтэ. Ол курдук, сотору кэминэн «Атамай төрүччүтэ” диэн кинигэлэрэ сүрэхтэнээри сылдьарын киэн тутта сырдатта. Кинигэҕэ 32 аҕа ууһа, 4000-тан тахса киһи киирбит. Оттон нэһилиэктэрин библиотекара “Древо 5” программа ис хоһоонун, тутулун үөрэттэ. Дьиэ кэргэн төрүччүтүн электроннай архыыбын оҥорууга сүбэ-ама биэрдэ.
Биир кэрэхсэбиллээх ыалдьытынан Чурапчы улууһуттан кэлэ сылдьар, 24 саастаах эдэр политолог Дмитрий Скрябин буолла. Кини номнуо 3 кинигэни бэчээттэтэн таһаарбыт. Кини историянан, төрүччүнэн ис сүрэҕиттэн сөбүлээн дьарыктанарын сырдатта. Маннык эдэр ыччат баарын тухары дойдубут кэлэр кэскиллээх эбит диэн кэлбит ыалдьыттар бэлиэтээтилэр.
Маны таһынан семинарга Орто Халыматтан, Кэбээйи улууһуттан бэрэстэбиитэллэр бэйэлэрин үлэлэрин үөрүйэхтэрин үллэһиннилэр, интэриэһиргиир ыйытыыларыгар эппиэт ыллылар.
Түмүккэ Кэбээйи улууҺа Төрүччү институтун кытта ыкса сибээстээх киэҥ кэскиллээх үлэ ыытылларыгар олук уурулунна. Хамыыһыйа бэрэссэдээтэлинэн П.Д.Степанов аатынан Кэбээйитээҕи кыраайы үөрэтэр түмэл директора Григорий Константинович Егоров куоластааһын түмүгүнэн талылынна.
Е.Е. Эверстов аатынан Кэбээйи орто оскуолатын медиакиинэ