Бэс ыйын 7 күнүгэр, Өрөспүүбүлүкэтээҕи «ТАБЫС» ыччат бэстибээлин чэрчитинэн ыытыллар «Бастыҥ бөҕөс» күрэх бастакы күнэ буолан ааста.
Уопсайа 11 бөҕөс кыттыыны ыла сылдьар:
- Горнай улууһуттан — Алмаз Захаров;
- Ньурба улууһуттан — Валентин Афанасьев;
- Хаҥалас улууһуттан — Денис Воробьев;
- Нам улууһуттан — Владислав Попов;
- Дьокуускай куораттан — Иван Степанов;
- Кэбээйи улууһун 1 хамаандатыттан — Яков Дмитриев;
- Үөһээ Бүлүү улууһуттан — Элдьар Мандаров;
- Чурапчы улууһуттан — Егор Лукин;
- Мэҥэ Хаҥалас улууһуттан — Денис Колесов;
- Кэбээйи улууһун 2 хамаандатыттан — Владислав Софронов;
- Сунтаар улууһуттан — Ньургун Антонов.
Бастакы күҥҥэ 400 м сүүрүү, «Үс төгүл үс», «Таас көтөҕүү» күрэхтэригэр бэйэлэрин холоннулар, оттон сарсын «Хапсаҕай» уонна «Мас тардыһыы» ыытыллара күүтүллэр.
Николаев Семен Егорович, «Бастыҥ бөҕөс» күрэх сүрүн судьуйата:
— Бастыҥ бөҕөс күрэхпит бастакы күнэ түмүктэннэ. Бүгүн уолаттар 3×3, сүүрүүгэ уонна таас көтөҕүүтүгэр күрэхтэстилэр. Кыттааччылар бары туох кыах баарынан кытыннылар. Быйылгы күрэхпитигэр «Дыгын ооонньуулара 2024» кыттыылааҕа, Кэбээйи бөҕөһө, Яков Дмитриев кэлэн киирсэ сылдьар. Эмиэ биир үчүгэй көрдөрүүлээх уол. Сарсын кыайыылаахтары быһаарар саамай тыҥааһыннаах киирсиилэрбит буолуохтара.
Яков Дмитриев, бүгүҥҥү «Бастыҥ бөҕөс» күрэх тааһы көтөҕүүгэ кыайыылааҕа, «Дыгын оонньуулара 2024» кыттааччыта:
— Дыгын оонньуутугар кыттарбар старт хайаан да наада, ол иһин бу күрэххэ кытта сылдьабын. Сарсын эмиэ киирсиилэр буолуохтара. Бэлэмнэнии үчүгэйдик бара турар. Быйыл олох үчүгэй бэлэмнээх уолаттар кэлбиттэр.
Санатан эттэххэ, ТАБЫС ыччат бэстибээлин чэрчитинэн ыытыллар «Бастыҥ бөҕөс» күрэх икки күн ыытыллыаҕа. Сарсын уолаттар хапсаҕайга уонна мас тардыһыытыгар бастыыр иһин киирсиэхтэрэ. Күрэх түмүгүнэн кыайыылаахтарга үһүс уонна иккис миэстэҕэ мотоцикл, бастакы миэстэҕэ квадроцикл туттарыллыа.
#ТАБЫС #фестивальмолодежи2024
Keskil14.ru