Муома улууһугар Улахан Чыыстайга «Магир» тыа хаһаайыстыбатын приозводственнай дьиэ кэргэнинэн көһө сылдьар община ыстаадатын иһинэн үлэлиир «Оралчимна» лааҕырга үөрэх дьылын этэҥҥэ түмүктээн оҕолор сайыҥҥы сынньалаҥнарыгар тиийдилэр.
Лааҕыр быйыл 20 сылын үлэлиир. Бу сыллар устата оҕону төрүт дьарыкка үөрэтэн-сыһыаран, үүнэр көлүөнэ табаһыттарын иитэн кэллэ. Быйыл эмиэ «Оралчимна» («Табаһыт») лааҕыр үбүлүөйдээх сезонун үөрэ-көтө арыйда.
Лааҕыр салайааччыта Екатерина Дьячкова кэпсииринэн, ыстаадаҕа маҥнай алта оҕо кэлбит.
— Айаал Тарабукин 7 кылааһы «хорошиһынан» бүтэрдэ. Кини быйыл лааҕырга иккис сылын кэлэр. Былырыын сылдьан таба үлэтин билсэн, сөбүлээн, быйыл 14 сааһын туолан, хамнаска үлэлии кэллэ. Сандаара Петрова — 7 кылааһы, Эвелина Корякина — 6 кылааһы эмиэ «хорошиһынан» бүтэрдилэр, бу биһиги сиэннэрбит, ыстаадаҕа кыраларыттан сылдьа үөрүйэхтэр. Ньургун Алексеев 2 кылааһы эмиэ үчүгэйдик түмүктээтэ. Кини убайын Ганяны (7кыл. бүтэрбит) кытта убайдарыгар Руслаҥҥа кэллилэр. Руслан эмиэ ыстаадаҕа лааҕырга сылдьыбыта, билигин номнуо ыстаадаҕа табаһыттыы сылдьар. Сорох оҕолорбут аны сотору таба сыл аҥаардааҕы ахсаана буолар, онно кэлэр техниканан кэлэллэр, — диэн иһитиннэрдэ «Магир» тыа хаһаайыстыбатын приозводственнай дьиэ кэргэнинэн көһө сылдьар община ыстаадатын бэрэссэдээтэлэ Екатерина Егоровна Дьячкова.
2021 сыллаахха «Магир» община Арктика министиэристибэтин гранын ылан, оҕолору илдьэ сылдьарга табыгастаах «Кержак» массыынаны быйыл кыһыҥҥы суолунан аҕалтарда. Онон ыстаада үлэһиттэрэ Арктика министиэристибэтигэр уонна СӨ үөрэҕэриитин туйгунугар, РФ уопсай үөрэхтээһинин бочуоттаах үлэһитигэр, «Родник» СОНКО бэрэссэдээтэлигэр Степанова Аксинья Егоровнаҕа махталлара муҥура суох.
Биһиги саайпыт өссө 2021 сыл сэтинньи ыйыгар СӨ Ил Дархана А.С. Николаев дьаһалынан сайыҥҥы бириэмэҕэ таба ыстаадатыгар үлэлиир оҕолорго үс ыйдаах хамнас төлөнөрүн туһунан иһитиннэрэн турабыт https://keskil14.ru/sajyn-taba-k-r-r-o-olorgo-s-yjdaah-hamnas-t-l-n-e/
Салгыы ыстаадаттан хаартыскалары көрүҥ:
Сандаара Петрова чаанньык оргутар, Айаал Тарабукин табаларын көрөр.
Эвелина Корякина табалары маныы бараары турар.
Айсен Соркомов уучаҕын кытары.
Анна СЛЕПЦОВА.