Бүгүн Сахабыт сирин үрдүнэн Арктика күнэ бэлиэтэнэр. Биһиги эрэдээксийэбит Муома улууһугар Улахан Чыыстай нэһилиэгин «Магир» тыа хаһаайыстыбатын дьиэ кэргэнинэн көһө сылдьар общинатын кытары сибээскэ тахсан кэпсэттэ.
«Магир» диэн эбээннии тылтан тылбааһа «Ыраас сир» («Чистая земля») диэн. Кырдьык даҕаны, бу ыраас систэрдээх, тыытыллыбатах айылҕалаах, уйаара-кэйээрэ биллибэт туундаралаах хоту дойду сирэ салгынныын, иһэр уулуун ыраас,чэнчис уонна чэбдик.
Кырачаан Дениһы эһиги билэҕит. Биһиги саайпытыгар кинини элбэхтэ таһааран турардаахпыт, бэл, челлендж ыытан көрбүппүт: https://keskil14.ru/chellendzh-billerebit-t-r-t-olohtooh-hotugu-noruottar-tyllarynan-ho-oonno-aj-uonna-videota-yyt/
Уолчаан билигин даҕаны күн солото суох. Бу күннэргэ кини сааскы хараалга сырытта. Хараал диэн ыстаада табатын ахсаанын ааҕыы, чиптээһин, анаалыс ылыы буолар. Манна ыстаадаҕа оройуон кииниттэн бэтэринээрдэр тиийэллэр.
Денис бэйэтэ эмиэ табаҕа маамыкта быраҕан көрдө. Түргэн кыыл хайыай, оҕоҕо туттарбата. «Чэ, син-биир ситиэм турдаҕа», — диэн уолчаан онтон хомойбот. Сотору улаатан эр хоһуун буолуо турдаҕа эбээт!
Ыстаада үлэтэ бүппэт түбүктээх. Киэһэлик Денис хоруудаҕа табаларга туус бэлэмниир. Онтон эһиги санааҕытыгар таба тоҕо тууһу сиирэ буолуой?
Табаҕа тоҕо туус кутан сиэтэллэрин туһунан «Магир» община бэрэссэдээтэлэ, удьуор табаһыт Екатерина Егоровна Дьячкова маннык диэн быһаарда:
— Табаны тууһунан тутарга табыгастаах, тутарга түргэн буолар. Маамыгынан тутарга табаны уһуннук эккирэтиэххэ наада. Ол иһин табаны бэйэбит тууһу сииргэ үөрэтэбит. Тууһу хаһан да сиэбэтэх табаҕа , тууһу тарбахтарбыт уһугунан айаҕар угабыт. Таба тууһу амсайда да, тута сөбүлүүр, бэйэтэ киһиттэн көрдүүр буолар. Оттон харыытаттан элбэх таба тууһу сиир. Тууһу сии үөрэммит табалары көрөн, атыттар эмиэ сиир буолаллар. Тууһу сии үөрэммит табалар туустаран сиэхтэрин баҕардахтарына, дьиэлэригэр, харыыталарыгар бэйэлэрэ тиийэн кэлэллэр. Ол табаһыкка улахан туһалаах буолар.
Хаартыскаҕа: Екатерина Дьячкова уонна Денис Павлов Муома хайаларыгар сэлфи.
Онон тууһу табаны тутарга, үөрэтэргэ туһаналлар эбит, табаһыкка көмөлөөх биир судургу ньыманан буолар.
Ити курдук ыстаада олоҕун биир күнэ биллибэттик ааста. Хоту сир хоһуун дьонун биир бэлиэ күнүнэн — Арктика күнүнэн эҕэрдэлиибит! Уҕараабат күүһү, эрчими, чэгиэн туругу баҕара хаалабыт.
Бэлэмнээтэ Анна СЛЕПЦОВА.