Атырдьах ыйын 22 күнүгэр Дьокуускайга «СахаЛето с Движением первых» оҕо сынньалаҥын тэрийээччилэрин өрөспүүбүлүкэтээҕи бэстибээлэ ыытылла турар. Саха сирин оҕону кытары үлэлиир, оҕо сынньалаҥын тэрийэр үөрэх тэрилтэлэрэ үлэлэрин уопутун көрдөрдүлэр. Олор истэригэр Арассыыйатааҕы оҕо уонна ыччат хамсааһынын 995 тыһыынча суумалаах Гранын хаһаайыттара Тааттатааҕы «Сатабыл» оҕо айымньытын киинэ кыттыыны ылла уонна «Бастыҥ коллективнай маастар-кылаас уонна чаҕылхай билиһиннэрии» кыайыылааҕынан ааттанна.
Матрена Алексеева, педагог-организатор, улуустааҕы «Үрдэл» биир сомоҕо тэрилтэтин салайааччыта, 2010 сыллаахтан «Сатабыл» оҕо айымньытын дьиэтин иһинэн «СИТИК» оҕо тэрилтэтин салайар:
— СИТИК — Сиэрдээх Иллээх Таатта Инники Кэскилэ диэн буолар. Бастатан туран, сүрүн үлэбит хайысхата хайа баҕарар оҕо лидерскай хаачыстыбаларын уһугуннарыыга болҕомтону уурууга сытар. Аны 2021 сылтан Саха Өрөспүүбүлүкэтин оҕолорун уопсастыбаннай холбоһуктарын сойууһун көҕүлээһининэн оскуола саастаах оҕолорго аналлаах «Түөлбэ баһаатайа» сайыҥҥы оскуола үлэлиир. «Түөлбэ баһаатайа» оҕолору түмэргэ, сайыҥҥы сынньалаҥнарын сөптөөхтүк атааралларыгар, бары түмсүүлээх буолалларыгар, ханнык баҕарар оҕо бэйэтин саастыылаахтарын кытары алтыһа үөрэнэригэр туһуламмыт бырагыраама буолар. Манна оскуола оҕолоро баҕа өттүнэн баһаатайдыыллар, түөлбэлэринэн үлэни тэрийэллэр. Былырыын 125 тыһыынча суумалаах Ил Дархан Гранын хаһаайыттарынан буолбуппут. Онтон быйыл «Оҕо сатабыла» диэн улахан бырайыакпытын Арассыыйатааҕы «Бастыҥнар хамсааһыннарын» 995 тыһыынча суумалаах гранын ыллыбыт. «Оҕо сатабылын чемпионата» сүрүн соруга оҕону кыра сааһыттан өбүгэлэрбититтэн хаалбыт үлэлэри өссө тупсаран, дьиэ кэргэнтэн саҕалаан оҕону иитэн-үөрэтэн таһаарыыга сытар. Манна оҕо төрөппүтүн, эбэтэр эбэтин, эһэтин кытары кыттыыны ылар. Ол кэннэ настаабынньык-педагогы кытары хаһыат таһаараллар. Быйыл алтынньы ыйга илин эҥэр улуустарыгар «Оҕо сатабылын чемпионатын» ыытарга былаанныыбыт.
keskil14.ru