Саха Өрөспүүбүлүкэтин судаарыстыбаннай былааһын ситэриилээх уорганнарын 2024 сыллааҕы үлэлэрин отчуота Таатта улууһугар түмүктэннэ. Официальнай бөлөх салайааччыта — Местников Сергей Васильевич, Саха Өрөспүүбүлүкэтин Правительствотын председателин солбуйааччыта. Кыттыыны ыллылар – Соколова Нюргуна Афанасьевна, Саха Өрөспүүбүлүкэтин Үөрэхтээһинигэр уонна Наукатыгар миниистирэ, Саха Өрөспүүбүлүкэтин государственнай мунньаҕын ((Ил Түмэн) депутаттара Лебедев Виктор Николаевич, Рахлеев Прокопий Дмитриевич. 2024 сыл түмүгүнэн улууспутугар, олорор нэһилиэкпитигэр туох үлэ ыытыллыбытый? Манна биһиги чуолаан бэлиэтиэхпитин баҕарабыт: бастакынан, саҥа күүрүүлээх объектар үлэҕэ киириилэрин. Ол курдук, А.Е. Мординов аатынан Таатта лицейин арыллыыта, хаарбах дьиэттэн көһөрүү программатынан саҥа дьиэлэр дьэндэйдилэр. Аны сайын Манчаары аатынан спорт күрэҕин улахан бырааһынньыгар анаан стадион, спорткомплекс үлэҕэ киирээри тураллар. Иккиһинэн, өрөмүөн үлэтигэр национальный проект чэрчитинэн Алампа аатынан оскуола саҥардыллыбыта. Үсүһүнэн, билигин үөрэхтээһини дойдубут салалтата улахан болҕомтоҕо ылла, чуолаан инженернэй, естественнэй-научнай хайысхаларга күүстээх үлэни уонна ирдэбили туруорда. Бу үлэҕэ тыа сиригэр олорор дьоҥҥо кэккэ ыарахаттардаах, промышленнай тэрилтэлэр, киин куорат да ыраахтар. Онно хайдах-тугу гынабыт диэн моһуоктаах боппуруоска депутаттар оруоллара улаханын таатталар биллибит.
Биһиги депутаттарбыт В. Н. Лебедевкэ уонна П.Д. Рахлеевка махталбыт муҥура суох. А.Е.Мординов аатынан Таатта лицейигэр Виктор Николаевич Лебедев салайар “Саханефтегазсбыт” тэрилтэтэ профильнай инженернэй кылааһын былырыын аспыта, бу Саха сиригэр биир бастакынан тыа сиригэр профильнай үөрэхтээһиҥҥэ бырайыак буолар. Ол чэрчитинэн оҕолор ХИФУ “Недропользование” салаатын кытта профориентационнай экскурсияҕа, ааспыт сайын полевой практикаҕа сырыттылар, үгүс көрсүһүүлэр, научнай лекциялар, предметтэринэн консультациялар буоллулар. Онтон депутат Рахлеев Прокопий Дмитриевич биһиги лицейбитигэр талааннаах оҕолору сайыннарар проегы өйөөн кэлии-барыы, методическай кинигэ таһаарыы ороскуоттарын толуйда. Түмүккэ правительствобытыгар саҥа оскуоланы адьас кылгас кэмҥэ тутан киллэрбиттэригэр барҕа махтал тылларын тиэрдэбит. Бу тутуу үлэтэ хара саҕаланыаҕыттан Местников Сергей Васильевич тус хонтуруолугар турбута, биһиэхэ кэлэн көрсөн, кэпсэтэн элбэҕи быһааран тутуу хайдах барарын көрө–истэ сылдьыбыппыт. Правительство үлэтин олохтоохтор үчүгэйинэн сыаналаатылар. Биһиги юнкордар эмиэ онно сөбүлэһэбит.
Наташа МОХНАЧЕВСКАЯ, Настя ПАРФЕНОВА, Алина УНАРОВА,
X кылаас, юнкорпост «МедиацентрТЛ»,
А.Е.Мординов аатынан Таатта лицейэ