2020-2021 үөрэх дьылыттан баҕалаах оҕолору ылан, «Бэйэбит илиибитинэн» диэн ааттаан эбии дьарык ыытан саҕалаатым.
Билиҥҥи оҕо ирдэбилэ, баҕата баһаам. Хомойуох иһин, кыра дэриэбинэҕэ, элбэх оҕолоох ыалга бу баҕа барыта баар буолбат. Ол иһин оҕолору аныгылыы предпринимательствоҕа, бэйэ оҥорон таһаарбыт үлэтин киэҥ эйгэҕэ таһааран, атыылаан, оскуола саҕаттан дохуот киллэринэргэ, харчыны сөптөөхтүк туһанарга үөрэтэр сыалтан маннык эбии дьарык тэрилиннэ.
Кыргыттар баҕаларын учуоттаан, үөрэх дьылын бастакы чиэппэригэр, күһүҥҥү сынньалаҥ кэмигэр ас астаан атыылаатыбыт. Үгүс минньигэһи, бурдук ас арааһын астаан, оскуолаҕа, нэһилиэкпит маҕаһыыныгар, анал сакаас ылан атыылаан, бастакы бэйэлэрин хамнастарын ылан үөрбүттэрэ. XI кылаас үөрэнээччитэ Сайыына Бочурова уонна IV кылаастан Элеонора Кусатова элбэҕи киллэринэн кыргыттарын куоттулар.
Иккис чиэппэртэн кыргыттар бэйэлэрин баҕаларынан, саҥа дьыллааҕы бэлэх оҥорорго күһэллибиттэрэ. Элбэх араас үлэлэри көрөн баран, оҕо уһуйааныгар, алын сүһүөх кылаас үөрэнээччилэригэр аналлаах саҥа дьылkааҕы кэмпиэт угарга “Kinder СЮРПРИЗ” быһыылаах хаалары оҥордубут.
Маны оҥорорбутугар элбэх мал наадата суоҕа, оҥорорго табыгастааҕа биһигини кэрэхсиппитэ. Кылгас кэмҥэ бары холбоон, 28 устуука “Кinder СЮРПРИЗ” быһыылаах кэмпиэт угар хаалары оҥорон атыылаан, бэйэлэрин бырааттарыгар, балтыларыгар саҥа дьыллааҕы бэлэх оҥорон үөртүлэр, бэйэлэрэ саҥа дьыллааҕы баҕаларын толорунар харчыланан үөрүүлэрэ үгүс.
Үөрэхпит дьылын үһүс чиэппэригэр Аҕа Дойдуну көмүскээччилэр, Аан дойду кэрэ анардарын күннэрин көрсө бэлэх оҥороору былаанныыбыт. Маны тэҥэ эрдэ ыытыллыбыт үлэлэрбитигэр салгыы сакаас хомуйан дьарыкпытын салҕыыбыт.
Кыргыттар бу дьарыктары сөбүлээтилэр, үөрэхтэн иллэҥ кэми туһалаахтык атаарары өйдөөтүлэр. Харчыны сөптөөхтүк туттарга үөрэннилэр.
Кусатова Ольга Ильинична,
«Бэйэбит илиибитинэн» эдэр эргиэнньиттэр түмсүү салайааччыта