Таатта улууһугар биир сомоҕо «Үрдэл» оҕо тэрилтэтигэр биир сүрүн хайысханы киллэрэммит 2010 сыллаахтан КВН-ныын бииргэ сайда сылдьабыт. Элбэх көлүөнэ оҕо «Саха КВН-ы» сөбүлээн дьарыктанна, салгыы оскуоланы бүтэрэн куоракка үөрэххэ бардахтарына даҕаны, КВН-ны кытта син биир бэйэлэрин баҕаларынан оонньууллар, ситим быстыбат. Ол курдук “Саха КВН” улуустааҕы, илин эҥэрдээҕи, өрөспүүбүлүкэтээҕи күрэхтэргэ наһаа элбэх ситиһиилээхпит.
КВН-ҥа оҕолор оонньуу үөрэнэллэригэр, КВН туһунан өйдөбүл ылалларыгар Геннадий Иванович Охлопков хамаандатын кытта улуус оскуолаларын хамаандаларын биир сиргэ түмэн «Саха КВН» үөрэҕин ыыталлар, коммунарскай сборга мунньан тэрийэн оонньотоллор. Кэрэхсэбиллээҕэ диэн, бу сэргэх хамсааһыны үгүс оскуола, оҕо тэрилтэлэрин салайааччылара сөпкө өйдөөтүлэр уонна өйөөтүлэр, педагогтар уонна төрөппүттэр интэриэстэрэ сыллата дириҥээн иһэр.
Быйыл оҕолорбутугар «Саха КВН» улуустааҕы күрэҕин сэтинньи ыйга тэрийэн ыытарга былааннаммыппыт. Оонньуу үрдүк таһымнаахтык ааһарыгар эрдэттэн оскуола хамаандаларын бэлэмнииргэ сорук турбута. Ол иһин Геннадий Ивановиһы кытта сүбэлэһэн алтынньы 26-27 күннэригэр ыыттыбыт. Ол чэрчитинэн үгүс сыллар тухары улууска оонньоон элбэх оҕо сайдыытыгар төһүү күүс буолбут Чөркөөх орто оскуолатын базатыгар «Биир күннээх Саха КВН оскуолата» үрдүк таһымҥа тэриллэн ааста. Бу тэрээһин ыытылларыгар оскуолатын көҥүллээн «Саха КВН» хамсааһына сайдарын табатык ылынан төһүү күүс-көмө буолбут ытыктабыллаах салайааччыга Егор Валерьевич Лебедевка уонна педагог-организаторга Мотрена Ивановна Собакинаҕа улаханнык махтанабыт!
Ол курдук, «Биир күннээх Саха КВН оскуолата» 10 хамаанданы түмэн «Саха КВН» сүрүн соругун – саха тылын баайын ыччакка төнүннэриигэ, cахалыы КВН-ҥа кыттар оҕолортон кэнэҕэс сытыы, тобуллаҕас толкуйдаах, сахалыы сайдам тыллаах-өстөөх, омук бастыҥ баайын иҥэринэ сылдьар дьон үүнэн-силигилээн тахсалларыгар олук ууран, хамаанда түмсүүлээх эрэ буоллаҕына, оонньуу үрдүк таһымҥа барарын өйдөтүү буолла. Бу Саха КВН туһунан кэпсээн-ипсээн, бэйэлэрин баай уопуттарын бэрсэн, оҕолору өрө көтүтэн оонньотон, биир тыыҥҥа киллэрэн өрөспүүбүлүкэ тутаах ооннооччулара Евгений Филиппов, Айтал Егоров, Айаал Морхоев, Алик Григорьев наһаа астыктык ыыттылар. Уолаттарга үөрэхтэригэр улахан ситиһиилэри, айымньылаах үлэни баҕара хааллыбыт.
Дьэ бу үөрэх кэнниттэн сэтинньи ыйга ыытыллар «Саха КВН» күрэҕэ элбэх оҕону хабан, сахалыы тылбытынан сайа саҥаран дьону үөрдэн истиҥ сыһыаҥҥа, үрдүк таһымҥа ыытыллыа диэн баҕа санаалаах хааллыбыт.
Матрена Алексеева, «Сатабыл» оҕо айымньытын дьиэтин педагог-организатора.
keskil14.ru