Биһиги улууспутугар “Сатабыл” оҕо айымньытын дьиэтигэр сылын аайы араас сонун тэрээһин ыытыллар. Олортон биир оҕо аймаҕы, дьиэ кэргэни түмэ тардар улахан тэрээһининэн “Оҕо Сатабыла” чемпионат буолар. Кулун тутар 14 күнүгэр ыытыллыбыт чемпионат “Таатта тардыы талаҕа” диэн тиэмэҕэ 5 компетенциянан ыытылынна. Улуус оскуолаларыттан барыта 7 хамаанда кэлбит.
Мин бииргэ үөрэнэр табаарыспын Эрсан Олейниковтыын «Өркөн өй» диэн компетенцияҕа кытынным. Таатта талаҕыттан оҕолор араас оонньуурдары оҥорон аҕалан кэпсээтилэр уонна оонньотон көрдөрдүлэр.
Биһиги кылааспыт уолаттара толкуйдаан оҥорбут “Биэтэҥкэ” диэн оонньууларын оскуолабыт оҕолоро тобулан оҥорбут “Таҥылык”, “Таатта талах дуобаттарын” оонньотон көрдөрдүбүт. “Биэтэҥкэҕэ” 2-4 эбэтэр хас да киһи оонньуур. Быраабылата уларыйан иһиэн сөп. Маҥнай талаҕынан оҥоhуллубут хаамысканы уочаратынан быраҕаллар, хас сыыппара түбэспитинэн талах оҕустары, аттары бэйэҥ миэстэҕэр уураҕын. Бириэмэҕэ биир да киhи оонньуон эмиэ сөп. Эбэтэр хас оҕуhу уурарынан буолар. Элбэх киһи уочаратынан биир-биир уурар. Ким биэтэҥкэни хамсатан суулларбыт туораан иһэр.
“Таатталыы талах дуобат” оонньууну 11 кылаас үөрэнээччитэ Василиса Мосоркина оҥорбута, кэлин кыратык уларыйбыта. Манна талаҕынан оҥоhуллубут дуобаттар бааллар, соҕотох киһи дуобаттара бэйэ-бэйэлэрин уочаратынан «сиэһиэхтээхтэр», бүтэhигэр биир да дуобат хаалыа суохтаах. Дуобат иннинэн-кэннинэн сатаан хаамар. Хас да дуобаты эмиэ «сиэн» сөп. Бу курдук ыыттааччылар да, дьүүллүүр сүбэ да оонньуурдарбытын олус биһирээтилэр. Түмүгэр кыайыылаах тахсан 1 степеннээх дипломунан, мэтээлинэн наҕараадаланан олус үөрдүбүт.
Карина Басова уонна Алина Таппырова омук тылын учуутала Розалия Васильевна Баишеваны кытта «Ийэ тыл, сурук-бичик» диэн компетенцияҕа кыттан тэрээһини сырдатар брошюра оҥорон таһаардылар. Аныгылыы ньымалары туһанан оҥорбут буолан үлэлэрэ эмиэ кэрэхсэннэ. Сахалыы тылынан сатаан кэпсииллэрин иһин хайҕанан иккис миэстэ буоллулар, 2 степеннээх диплом ыллылар.
“Эhээ Сатабыла” диэн компетенцияҕа талахтан кур оҥоһуллуон сөптөөх диэн бастакынан оҥорон саҕалаабыт Михаил Трофимович Боппосов уонна Сахайаан Боппосов наhаа үчүгэй талах куру оҥороннор 3 степеннээх диплому ыллылар. Бу оҥоһуллубут курдар Тааттаҕа ыытыллар “Манчаары оонньууларыгар” бэлэххэ быһыытынан барыахтара.
«Саха сатаабатаҕа суох» диэн компетенцияҕа биhиги оҕолорбут бэйэ оҥоhугун уонна ас атыылаан иккис миэстэҕэ тигистилэр. Бу компетенцияҕа Сайнаара Боппосова, Айыллаана Аржакова математика учуутала Айыына Альбертовна Аржакованы кытта оҕолор оҥоһуктарын уонна бэйэлэрин үлэлэрин түмэн атыылаатылар. Киирбит харчы 10 бырыһыанын 2250 солк. “Манчаары оонньууларын” тэрээһинин фондатыгар барда.
Чемпионат уопсай түмүгэр биhиги оскуолабыт хамаандата Туора Күөл оскуолатын кэнниттэн иккис миэстэни ылла. Кубок уонна 2000 солк. сууммалаах сертификат бэлэх туттубут. Бу тэрээhини олус сөбүлээн сыл аайы көхтөөхтүк кыттабыт уонна наар бириистээх миэстэҕэ тиксэбит.
Айаана СЕМЕНОВА, VII кылаас,
В.И. Ленин аатынан Уолба орто оскуолата, Таатта