Баайаҕаҕа Мандар Уус аатынан сайыҥҥы оскуолаҕа Герман, Клавдия Хатылаевтар куораттан кэлэннэр сайын лааҕырдыыллар. Ол туһунан бастаан миэхэ кылааһынньыктарым кэпсээбиттэрэ, мин онно үөрэниэхпин баҕарбытым.
Герман Васильевич күпсүүргэ уонна кырыымпаҕа оонньуурга үөрэтэр, онтон Клавдия Филипповна хомуска, ыллыырга уонна оһуохайдыырга үөрэтэр.
2023 сыллаахха от ыйыгар биһиги кылаастан элбэх оҕо буоламмыт лааҕырга үөрэнэ айаннаабыппыт. Бастакы күммүтүгэр музыкаҕа дьоҕурбутун бэрэбиэркэлээбиттэрэ. Биһиги бары этэҥҥэ туттараммыт астыммыппыт аҕай. Группанан улахаттар уонна кыралар диэн араарбыттара. Күпсүүргэ ооньуохпут иннинэ бэлэмнэнии буолар, паалканы сөпкө тутарга уонна сөпкө турарга. Инструменнарга оонньуурга, ыллыырга барытын бэйэлэрэ көрдөрөн үөрэтэллэр. Бастаан оонньуурга ыарырҕатар этибит, онтон үчүгэйдик көрөн, истэн оонньуур буолбуппут.
Германнаах Клавдия оскуолалара сахалыы тыыннаах. Кинилэр күн аайы сахалыы таҥналлар, сахалыы кэпсэтэллэр, холку майгылаахтар. Хаһан да кыыһырбаттар, мөхпөттөр, оҕолору кытта тэҥҥэ кэпсэтэллэр.
Сынньалаҥҥа таһырдьа тахсаммыт оонньуубут. Оонньууну урут Мандар Уус оскуолатыгар үөрэммит оҕолор тэрийэллэр.
Уон күн иһигэр үөрэммит билиибитин, сатабылбытын көрдөрөр түмүктүүр кэнсиэр буолбута. Баайаҕа олохтоохторо кэнсиэр көрө кэлэннэр, зал толору этэ. Кэнсиэр иннинэ биһиги кыратык долгуйбуппут. Ол эрэн салайааччыларбыт көмөлөрүнэн нүөмэрдэрбитин толору, иҥнибэккэ толорбуппут. Ол курдук түмүктүүр кэнсиэрбит үчүгэйдик ааспыта, элбэх номердары көрдөрөн бары астыммыттара.
Лааҕыр кэнниттэн, кыһын устата оскуола аатыттан күпсүүрүнэн араас кэнсиэрдэргэ кыттар буолбуппут. Сотору буолаат төрөппүттэрбит сценаҕа кэтэр анал таҥас тиктэрбиттэрэ, хас биирдиибит күпсүүр оҥорторбуппут. Кыһын бэйэбит араас тэтимнэри толкуйдаан бэлэмнэнэр этибит. Табыктары кытта хомусчуттары холбооммут саҥа нүөмэрдэры оҥорон араас кэнсиэрдэргэ, спортивнай күрэхтэһиилэргэ кыттыбыппыт, дьон иннигэр тахсан оонньуурга үөрэннибит.
Быйыл сайын бэс ыйыгар Герман, Клавдия Хатылаевтар биһиги оскуолабытыгар аҕыйах күн устата үлэлээн бардылар, саҥа тэтимҥэ үөрэттилэр. Бу курдук эһиил Тааттаҕа буолар Манчаары оонньууларыгар биһиги кылааһынан кыттарга бэлэмнэнэбит. Онно төрөппүттэрбит, оскуолабыт күүс-көмө буолаллар.
Сардана Фёдорова,
Тааттатааҕы лицей 8 кылааһын үөрэнээччитэ