Сэтинньи 18 күнүгэр ытык Таатта килбэйэр киинигэр, Ытык-Күөлгэ, Оҕо айымньытын дьиэтин иһинэн үлэлиир “Үрдэл” биир сомоҕо оҕо хамсааһынын тэрээһининэн улуустааҕы оскуола оҕолорун «Саха КВН» оонньууларын күрэҕэ үрдүк таһымнаахтык буолан ааста.
11 хамаанда кэлэн илин-кэлин түсүһэн, бэйэлэрин кыахтарын көрдөрөн, саха тылын көргө-көрүдьүөскэ сатаан тутталларын норуокка тиэрдэн, атын оскуола оҕолорун кытта доҕордоһон, санаа атастаһан үөрэн-көтөн тарҕастылар. Күрэх сыалынан буолла: саха ыччата төрөөбүт тылын туттар эйгэтин кэҥэтии, “Саха КВН” хамсааһынын салгыы сайыннарыы, бастыҥ хамаандалары уонна оонньооччулары бэлиэтээһин.
Күрэх 3 түһүмэҕинэн барда:
1. «Бэйэни билиһиннэрии» — 5 мүн., тиэмэтэ: “Ким доҕордоох – ол дьоллоох”;
2. “Биатлон” — кылгас көрүдьүөстэри этии;
3. “Биир ырыа түһүмэҕэ” — 3 мүн.
«Саха КВН» оонньооччуларын дэгиттэр талааннарын, булугас өйдөрүн сыаналаата дьүүллүүр сүбэ маннык састаабынан үлэлээтэ: Константин Леонидович Егоров, Алампа аатынан Ытык-Күөл 1 нүөмэрдээх орто оскуолатын дириэктэри иитэр үлэҕэ сүбэһитэ, 2010 сыллаахха Таатта улууһугар “Мистер КВН” хаһаайына, устудьуон кэмигэр “Сэргэлээх сэргэхтэрэ” КВН хамаанда оонньооччута, дьүүллүүр сүбэ бэрэссэдээтэлэ; Туяра Федоровна Куприянова, Тааттыныскай нэһилиэк баһылыгын социальнай боппуруоска солбуйааччыта; Татьяна Ивановна Захарова, Норуот айымньытын дьиэтин иһинэн үлэлиир “Кустук” образцовай драматическай театрын салайааччыта; Алексей Алексеевич Пономарев, студенческай лига «Күөн күрэс» КВН хамаандатын оонньооччута, улуус, Лига КВН ХИФУ чемпиона, “Мистер КВН” ХИФУ, “Саха КВН” студенческай лига призера, Валерий Валериевич Чарин, 2011 сылтан 2016 сылга диэри “Саха КВН” лигатын тутаах оонньооччута, улуус, республика кыайыылааҕа, призера, урбаанньыт.
Дьүүллүүр сүбэ сыаналыырыгар болҕомтону хамаанда көрүгэр-күлүүтүгэр, артыыстааһыныгар, сценическай культураны тутуһуутугар, музыкальнай таһымыгар, имиджигэр, төрөөбүт төрүт тылбытын сөптөөхтүк көргө-нарга туттууга уурда.
Улахан тыҥааһыннаах күрэх кэнниттэн: «Сыммыыттарга» (саҥа оонньооччуларга):
1 миэстэ – “Панкейки”лицей хамаандата;
2 миэстэ – “Элэккэй”, Дьохсоҕон орто оскуолатын хамаандата;
3 миэстэ – “Барбарики”, Оҕо айымньытын дьиэтэ «Сатабыл» хамаандата;
Онтон 3 түһүмэххэ барытыгар оонньообут хамаандаларга:
1 миэстэ – “Ситик”, Оҕо айымньытын дьиэтэ “Сатабыл” хамаандата;
2 миэстэ – “Хаатыҥка”, Тыараһа орто оскуолатын хамаандата;
3 миэстэ — “BLACK PINK”, Чөркөөх орто оскуолатын хамаандата.
Ону таһынан «Бэрт бэтиэхэ» анал ааты ылла Баайаҕа орто оскуолатын “Уоттар” хамаандата; “Мэкчиргэ мэйии” анал ааты ылла Хара-Алдан орто оскуолатын “Кистэлэҥ дьон” хамаандата; «Бастыҥ көрүдьүөс» анал ааты ылла “Сатабыл” Оҕо айымньытын дьиэтин “Көмүс чороон” хамаандата; “Саха КВН эрэлэ” анал ааты ылла Уолба орто оскуолатын “Чукучуомнар” хамаандата; “Көрөөччүлэр биһирэбиллэрэ” анал ааты ылла Игидэй орто оскуолатын “Мэник-Тэник” хамаандата.
“Көрдөөх Көкөт” анал ааты ылла Канаев Афоня “Ситик” хамаанда; “Күн Күлүүк” анал ааты Таттаана Егорова «Хаатыҥка» хамаанда; “Бастыҥ топер” анал ааты ылла Дмитриев Владислав “BLACK PINK” хамаанда.
Биир күн көрү-нары сөбүлээччилэргэ истиҥ-иһирэх киэһээни бэлэхтээбит «Саха КВН» хамаандаларыгар махтанабыт. Бу курдук түмсүүлээхтик, туохтан да толлубакка, саха тылын табатык көргө-нарга туттан дьону үөрдэ-көтүтэ турдуннар.
“Сатабыл” медиастудия, Тааттатааҕы «Сатабыл» оҕо айымньытын дьиэтэ.