Кулун тутар 28-29 күннэригэр Таатта улууһун киинигэр Ытык-Күөлгэ А.Е. Турнин аатынан спорткомплекска Н.Н. Тарскай бирииһигэр өрөспүүбүлүкэтээҕи көҥүл тустууга турнир буолан ааста.
Биһиги бу улахан турниры икки күнү быһа көтүппэккэ көрдүбүт. Тренербит Константин Егорович тустарыгар уонна бэйэбит биир дойдулаахтарбыт Үөһээ Бүлүү улууһун хамаандатыгар «ыарыйдыбыт». Маннык улахан таһымнаах күрэхтэһиини саҥа көрдүм. Ааттаах-суоллаах тустууктар бааллар.
Араас албастары барытын тутталлар. 57 кг вертушка албаһы үчүгэйдик тутталларын сэҥээрдим. Дьокуускай куоракка спортивнай базаҕа биһигини дьарыктаабыт Федор Постников чөмпүйүөн үрдүк аатын сүктэ. Биир дойдулаахтара «ыалдьан» хаһыы-ыһыы бөҕөнү түһэрдилэр. Саала иһэ оргуйан олордо.
Биһигини «Триумфка» дьарыктаабыт Дьулустаан Николаевич Сивцев күрэхтэһии көбүөрүгэр судьуйанан үлэлээтэ.
Таатта дьоно-сэргэтэ олус аламаҕайдар эбит дии санаатым. Биллэр-көстөр саха суруйааччылара үксүлэрэ Тааттаттан төрүттээхтэрин Хадаайытааҕы литературнай музейга сылдьан биллим. Аһаҕас халлаан анныгар турар мусуойу көрөн сэҥээрдим. Элбэх да политсыылынайдар Саха сиригэр сыылкаҕа кэлэн олорбуттар эбит. Сабыс-саҥа үс этээстээх А.Е. Мординов аатынан лицей баар эбит. Бэйэтэ сүүс миэстэлээх интернаттаах. Биһиги ол интернакка олорон И.С. Кочкин бирииһигэр тустууга күрэхтэстибит.
Тустууга үчүгэйдик дьарыктанан бараммын, Тааттаҕа кыайардыы, миэстэлэһэрдии күрэхтэһэ кэлиэҕим дии саныыбын.
Олус элбэх сонуну, интэриэһинэйи көрбүтүм-билбитим иһин тренербэр, Константин Егоровичка, биһигини үс куну быһа арыаллаан илдьэ сылдьыбыт Варвара Константиновнаҕа махтанабын.
Алгыс Ильин, С.Е. Дадаскинов аатынан Кырыкый оскуолатын 6 кылааһын үөрэнээччитэ, Үөһээ Бүлүү улууһа.
Кэскил14.ру