Саха оҕото сахалыы тылы көргө-нарга сөптөөхтүк туттарыгар көмөлөһөр сыаллаах, сыанаҕа көҥүллүк тутта-хапта үөрэнэригэр, хамаандаҕа биир тыыҥҥа киирэн оонньууругар аналлаах «Саха КВН» күрэҕэ Таатта улууһугар сылын аайы ыытыллар. Быйыл эмиэ үгэс курдук, сэтинньи 29 күнүгэр, Норуот айымньытын дьиэтигэр 106 оҕону хабан 9 үөрэх тэрилтэтин хамаандалара илин-кэлин түһүстүлэр.
Бу күрэххэ былырыын оскуола оҕолорун икки ардыларыгар өрөспүүбүлүкэтээҕи «Саха КВН» күрэҕэр кыайыылаах буолбут Туора Күөл оскуолатын «Дьүлэй Дьээбэлэрэ» бастыахтарын бастаатылар уонна ыччат өрөспүүбүлүкэтээҕи «Саха КВН» оонньууларын сайыҥҥы Кубогын кыайыылаахтара «Ситик» хамаандата «Сатабыл» оҕо айымньытын дьиэтиттэн 2-3 миэстэлэри ыллылар.
Атын хамаандалар бары анал ааттарга тигистилэр. Күрэх саамай кэтэһиилээх анал ааттарын «Ситик» хамаандалара ыллылар: Афоня Канаев «Көрдөөх Көкөт» уонна Аделина Романова «Күн Күлүүк» буоллулар. Онтон» Бастыҥ топер» аатын Саян Атастыров «Дьүлэй Дьээбэлэрэ» ылла.
Бу тэрээһини үрдүк таһымҥа ыытар сыалтан Дькуускайтан өрөспүүбүлүкэ бастыҥ оонньооччулара, «Саха КВН» таһымын билэ сылдьар шеф-редактор Женя Филиппов уонна Айтал Егоров дьүүллүүр сүбэни кэлэн салайан үлэлэппиттэригэр, туһалаах сүбэлэри биэрбиттэригэр улаханнык махтанабыт.
КВНщик уолаттар Таатта улууһугар «КВН» сайдыытын, оҕолор бигэтик «КВН» диэни өйдөөбүттэрин бэлиэтээтилэр. Бары үөрэн-көтөн тарҕастыбыт.
Матрена Алексеева, Тааттатаҕы «Сатабыл» оҕо айымньытын дьиэтин педагога.
keskil14.ru