Сааскы сынньалаҥ күннэригэр «Ночь в театре» диэн тэрээһиҥҥэ П.А.Ойуунускай аатынан Саха академическай театрыгар ыалдьыттаатым.
Бастаан үөрүүлээх арыллыы кэнниттэн фойеҕа үс испэктээги быһа тардан көрдөрбүттэрэ, ол курдук «Тулаайах оҕо», «Хаарыан хампа күөх кытылым», «Ойуур». Ити кэннэ станциянан түһүмэхтэри ааспыппыт. Холобура, «Афиша» диэн станцияҕа мин табаарыспын кытта Д.П.Коркин афишатын оҥорбуппут.
«Тиэтэйбит» испэктээк маастар-кылааһыгар сылдьыбыппыт. Манна Павел Ченянов уонна Ильяна Павлова оонньообуттара. Ол кэннэ улахан саалаҕа барбыппыт. Онно түөрт испэктээги көрдөрбүттэрэ: «Лоокуут уонна Ньургуһун», «Отелло», «Ромео уонна Джульетта», «Тулаайах оҕо». Иккилии-үстүү артыыс быһа тардан көрдөрөллөр, ол кэннэ көрөөччүлэр сыанаҕа тахсан оонньообуттара. Мин «Тулаайах оҕо» испиктээккэ Тыгын Дархан оруолун толорбутум. Бу оруолу Саха театрын дириэктэрэ, биһиги биир дойдулаахпыт Петр Макаров оонньуур. Кини миигин ыҥыран ылан, гримнээн уонна таҥас кэтэрдэн оруолга бэлэмнээбитэ.
Ол кэннэ квест-оонньуу буолбута: үс испэктээги библиотекаҕа, лабораторнай уонна Алампа саалатыгар көрдөрбүттэрэ. «Сарсыарда. Уу чуумпуга», «Тиэтэйбит», «Бүтэһик малыыппа» диэн испэктээтэри көрдөрбүттэрэ. Кыра саалаҕа артыыстар ыалдьыттары гримнээбиттэрэ, араас паригы, артыыстар атрибуттарын кэтэн хаартыскаҕа түспүппүт.
Саха театр устунан экскурсияны Татьяна Легантьева уонна Елена Маркова бэрт кэрэхсэбиллээхтик кэпсээн ыыппыттара.
Бу тэрээһиҥҥэ сылдьан астынным. Тоҕо диэтэххэ мин инникитин артыыс буолар баҕалаахпын. Култуура олоҕун кылгас кэм иһигэр олус үчүгэйдик билиһиннэрдилэр, хас биирдии кэлбит ыалдьыкка театр ураты тыынын иҥэрдилэр.
Владислав Афанасьев,
М.Е. Васильева аатынан 2-с Малдьаҕар орто оскуолатын
IX кылааһын үөрэнээччитэ.