Чурапчы улууһугар түөрт күннээх остуол тенниһигэр өрөспүүбүлүкэтээҕи күрэх буолан ааста. Өрөспүүбүлүкэ 21 улууһуттан барыта 179 оҕо кыттыыны ылла.
А.И. Федотов аатынан спорт уораҕайыгар 16-гар диэри саастаах уолаттар уонна кыргыттар теннискэ күөн көрүстүлэр. Оҕолор туох баар кыахтарын ууран туран оонньоотулар. Олус сытыытык-хотуутук, сып-сап хамсаналлар, тенниһи олус сөбүлүүллэрэ көстөр. Биһиги кинилэри кытта теннис туһунан сэһэргэстибит.
Александр Алексеевич Алексеев, теннис спордугар Бүтүн Арассыыйатааҕы категориялаах судьуйа, Чурапчыга теннис түһүлгэтин ыыта сылдьар:
– Теннис түһүлгэтэ үрдүк таһымнаахтык ааста. Хамаанданан 21 улуус кытынна. Кинилэртэн Дьокуускай куорат бастакы, Чурапчы иккис, Нерюнгри үһүс миэстэ буоллулар. Күрэх олунньу 20 күнүттэн 24 күнүгэр диэри сарсыарда тоҕус чаастан киэһэ сэттэ чааска диэри тохтоло суох ыытылынна. Тыҥааһыннаах, кэрэхсэбиллээх киирсиилэр буоллулар.
Бу күрэхтэһиини үрдүк таһымҥа тэрийэн ыыппыт Чурапчы улууһун дьаһалтатыгар, улуус үөрэҕин салаатыгар, ону таһынан ДЮСШ салалтатыгар, дириэктэригэр Александр Романовичка бэйэм ааппыттан истиҥник махтанабын.
Оҕолор тенниһинэн элбэх сыл дьарыктанан, бэйэлэригэр бэрээдэги, спорка тапталы уонна күүстээх санааны, дьулууру сайыннарбыттар. Элбэх күрэххэ кыттан, туохтан да иҥнибэккэ, бара турарга үөрэммиттэр. Көрөргө олус астык. Хас биирдиилэрэ чаҕылыйа сылдьаллар. Нууччалыы эттэххэ, «в здоровом теле – здоровый дух».
Күрэххэ уопсай түмүккэ иккис миэстэ буолбут Чурапчы хамаандатын оҕолорун кытта кэпсэттибит. Оҕолор үөрүүлэрин үллэстэллэр уонна бары теннис спордун таптыыр, биир санаалаах дьонноругар эҕэрдэлэрин тиэрдэллэр.
Ситиһиилээх эдэр спортсменнарга итии-истиҥ эҕэрдэ! Салгыы үүнэ-сайда тураргытыгар баҕарабын! https://vk.com/wall-199463452_26855
София ГОГОЛЕВА, VIII кылаас, «Тумус кыһа» медиа киин,
С.К. Макаров аатынан Чурапчы гимназията