Кулун тутар 20 күнүгэр оскуолабытыгар Бүтүн Арассыыйатааҕы «Сдаём вместе! День сдачи ЕГЭ родителями» аахсыйа ыытылынна. Бу күн төрүппүттэрбит эксээмэн туттаран холоннулар.
«Рособрнадзор» тэрилтэ бу тэрээһини быйыл VIII төгүлүн ыытары көҕүлүүр. Тэрээһини директоры иитэр үлэҕэ солбуйааччы А.В. Гаврильев, учууталлар А.И.Санникова, С.П.Санникова, А.В.Санников ыыттылар.Төрөппүттэр БКЭ туттарыы быраабылатын, хайдах быһыылаахтык ыытылларын уонна үлэ сорудахтарын кытта билистилэр.
Мин эксээмэнтэн тахсыбыт төрөппүттэри кытта кэпсэттим.
Розалия Варламовна Дмитриева:
— Бүгүн БКЭ туттарыахтаах оҕолор төрөппүттэрэ оскуолаҕа кэлэн оҕолорбут эксээмэн туттарар балаһыанньаларыгар киирэн, быраабылатын барытын тутуһан, суругун-бичигин толорон 2 чаас курдук олордубут. Учууталлар барытын олус үчүгэйдик быһааран биэрдилэр, үөрэттилэр. Мин тус бэйэм оҕо, кырдьык, долгуйуон сөп эбит диэн итэҕэйдим. Киһи бэйэтин туһугар тиийдэҕинэ долгуйар, ыксыыр эбит. Онон бу кэмҥэ төрөппүттэр оҕолорбутугар күүс-көмө, өйөбүл буолан сылдьарбыт наадалаах.
Василий Леонидович Федоров:
— Биһигини киирэн истэхпитинэ анал приборунан бэрэбиэркэлээбиттэрэ. Ол кэннэ кылааска киирбиппит. Үлэбитин толоруохпут иннинэ, барытын быһааран биэрбиттэрэ. История сорудахтарын толордубут. Мин кыргыттарым БКЭ-ни этэҥҥэ туттаран, билигин үөрэхтэрин бүтэрэн, үлэһит дьон буоллулар. Онтон уолум эһиил 11 кылаас буолар. Эксээмэн туттарыахтаах оҕолорго ситиһиини, тулуурдаах буолууну баҕарабын!
Бу аахсыйа эксээмэн боппуруостарын, үөрэнээччи бырааба төһө тутуһулларын төрөппүт таба өйдүүрүгэр анаан ыыттыллар. Төрөппүттэр эксээмэн ыытыллар сирэ ирдэбилгэ эппиэттиирин, регистрацияттан саҕалаан үлэ толоруутугар, бэрэбиэркэтигэр тиийэ сөптөөх иһитиннэриини ылан бардылар. Маны сэргэ кэтээн көрөөччү үлэтин, видео-кэтэбили, эксээмэн туттарааччыга ханнык хааччахтар баалларын билистилэр. Тэрээһиҥҥэ сылдьыбыт дьон атын төрөппүттэргэ, оҕолорго бүгүн билбиттэрин-көрбүттэрин тиэрдиэхтэрэ, сүбэ-ама биэриэхтэрэ.
Алина Санникова,
IX кылаас,
Дүллүкү, Үөһээ Бүлүү