Быйыл III төгүлүн төрөппүттэр ЕГЭ туттардылар. Ол курдук, олунньу 27 күнүгэр ийэлэр, аҕалар, эһээлэр, эбээлэр нуучча тылыгар экзамен туттардылар. Yгүстэрэ XI кылаас төрөппүттэрэ.
Экзамен күнүс 3 чаастан саҕаланна. Дириэктэри үөрэх чааhыгар солбуйааччы С.П. Санникова, сорудахтаах лиистэри түҥэтэн, хайдах толороллорун сиhилии быhааран биэрдэ.
Биhиги төрөппүттэри кэтэhэн, төhө долгуйбуттарын, хайдах толорбуттарын ыйыталастыбыт.
В.В. Софронов, олохтоох дьаhалта специалиhа:
—Аҥаардас металлоискатель нөҥүө ааhарбар долгуйдум аҕай. Онтон аны бланкабын толорорбор, буукубаларбын сыыhа туруоран кэбиhиэм диэн долгуйдум. Образеhынан көрөн, кыhаллан толордум. Оскуоланы бүтэрбитим 13 сыл буолла, программаны кыратык умуннаҕым дии, онон сорудахтара ыарахан соҕустар этэ. Билэр боппуруостарым бааллар. Бэлэмнэнэн, консультация ылан баран туттарыахха сөп эбит дии санаатым. Сорох төрөппүттэр бэлэмнэнэн кэлбиттэр, үчүгэйдик толоро олороллор. Yлэбэр ыксаан, эрдэ таҕыстым.
М.М. Хоппоторова, интэринээт иитээччитэ:
— Төрөппүттэри ЕГЭ-ҕэ холонон көрөргө ыҥырбыттара олус үчүгэй. Тэрийээччи Саргылана Петровна үлэбитин толоруохпут иннинэ саас-сааhынан барытын быhааран биэрдэ. Куhаҕана диэн, уот баран ылла. Дьиҥнээх экзамен кэмигэр уот бардаҕына, 15 мүнүүтэ иhинэн дизель холбоно охсуохтаах эбит. «Оннук түбэлтэҕэ биhиги оскуолабытыгар 3 мүнүүтэ иhинэн дизели бэлэм гынааччыбыт», — диэтилэр.
В.А. Струкин, биэнсийэлээх:
— Оскуоланы бүтэрбитим 41 сыл буолла. Yөрэх программатын умнан бөҕө буоллаҕа. Ол эрээри улаханнык долгуйбатым. Эрдэттэн бэлэмнэммит киhи ЕГЭ сорудахтарын холкутук толоруох курдук эбит дии санаатым. Быйыл кыыhым XI, уолум IX кылааhы бүтэрээри сылдьаллар. Онон оҕолорбутугар аны саас экзаменнарын ситиhиилээхтик туттаралларыгар баҕарабыт!
Бу курдук төрөппүттэр бэйэлэринэн ЕГЭ диэн тугун биллилэр, таарыччы оскуола саастарын санаан аастылар.
Петя Семенов, Уруйдаан Прокопьев,
VII кылаас,
Дүллүкү, Yөhээ Бүлүү,
«Эрчим» пост.