Чурапчы улууһун Сылаҥ нэһилиэгин «Сулусчаан» оҕо саадыгар, «Ийэ күнүгэр» аналлаах тэрээһиннэр түмүктэннилэр. Ол курдук, алтынньы 19 күнүгэр аныгылыы форматтаах уопсай төрөппүт мунньаҕа ыытылынна. Оҕолор ийэлэрин уруһуйдаабыт үлэлэрин түмүгүнэн быыстапка турда. Маннык форматтаах тэрээһин аан бастакытын буолбут буолан, кэлбит төрөппүт олус сэҥээрдэ.
Быыстапка-дьаарбаҥкаҕа кытыннылар, фотозонаҕа хаартыскаҕа түстүлэр, кыра фуршет тэрилиннэ. Төрөппүттэрбит былырыын көҕүлээн тэрийбит «Фитобар» проект ураты киһиэхэ туһалаах, эмтээх, минньигэс утахтарын амсатта.
Методист Макарова Н.А., быйылгы үөрэх дьылын былаанын, оҕо саадын үлэтигэр туттуллар электроннай ресурстарга туох-тоҕо ирдэнэрин, оҕолор ситиһиилэрин сырдатта. Сайдыылаах олох ирдэбилинэн Цифровой технологиялары туһанан куйаар ситимин нөҥүө Чурапчытааҕы УСЗН идэлээх үлэһитэ Макарова А.Е., кытта быһа сибээскэ холбонон, босуобуйалар, туох уларыйыылар баалларын, социальнай контракка хайдах кыттыахха сөбүн, араас льготалар тустарынан иһитиннэрдэ. Салгыы, «Виктори-Клиник» чааһынай тэрилтэ оҕо бырааһын сэбиэдиссэйэ, медицинскай наука кандидата, гематолог Банщикова Е.С., быһа сибээскэ холбонон олус элбэх туһалааҕы кэпсээтэ. Оҕо саадын иһинэн үлэлиир «Семицветик» сулуусба төрөппүтү кытта үлэтин Сивцева Е.П., сырдатта. Маллаах иһити оҥорууга маастар-кылааһы тэрийэн ыытта.
Төрөппүттэрбит маннык аныгылыы форматтаах мунньаҕы олус астыннылар, аныгыс төрөппүт мунньаҕа өссө интэриэһинэй буолуо диэн эрэнэллэрин эттилэр. Төрөппүт аҥардас оҕо саадын үлэтин эрэ буолбакка, тус тулалыыр эйгэҕэ, оҕо уонна төрөппүт ыкса сибээһигэр туһалаах информацияны ылан бараллара олус наадалаах эбит диэн түмүккэ кэллибит.
Нарыйа Алексеевна Макарова, методист.
«Сулусчаан» оҕо саада, Сылаҥ, Чурапчы улууһа.