Самаан сайын үгэннээн, оҕо-аймах кыахтаах өттө сытан сынньаммакка, үлэ-хамнас сырсыытыгар сылдьар. Мин сайыҥҥы сынньалаҥнарын сылын аайы туһалаахтык атаарар убайдарым тустарынан кэпсиэхпин баҕарабын.
Орто Халыма улууһун Г.Г.Софронов аатынан орто оскуола 10 кылааһын бүтэрбит Винокуров Ваня уонна Кудрин Коля алын кылаастан ыла сайын аайы олохтоох сылгы собуотун кытта кэпсэтиһэн, бостуук көмөлөһөөччүтүнэн, ыччат сүөһү көрөөччүнэн ыраах учаастакка баран үлэлииллэр. Быйыл да бөһүөлэктэн тэйиччи баар Чоҥкуйа учаастагар сүөһү көрөөччүгэ, сылгыһыкка көмөлөһөөччүнэн баран үлэлии сылдьаллар. Салайааччылара — Ваня аҕата Винокуров Афанасий Иванович. Уолаттар күннээҕи үлэлэринэн сүөһүнү бырдахтан харыстаан, түптэни буруолатыы уонна хаһааҕа киллэрэн сынньатыы буолар. Санаан көрдөххө, судургу курдук да буоллар, бырдах кэмигэр бырдаҕырҕаабыт сүөһүлэр өйдөрө сүтэр. Тыал хоту мээнэ баран хаалыахтарын эбэтэр ууга киирэн, бадарааҥҥа батыллыахтарын да сөп. Ону барытын бостуук көмөлөһөөччүлэрин кытта көрөн-истэн, хонтуруоллуохтаахтар. Хаһааҕа киирбит сүөһү олус уһуннук турара эмиэ сатаммат, аһары тиритэн, бырдахха олус илистиэн сөп. Онон бостуук үлэтэ олус түбүктээх үлэ буолар.
Оттон быйыл өтөрүнэн түспэтэх олус бырдахтаах сайын буолан биэрдэ. Бэл диэтэр, бөһүөлэкпит иһигэр бырдахтан тумнастан биир ынах сүөһү өллө.
Онон убайдарым барахсаттар олус уустук үлэҕэ сылдьалларын билэбин. Кинилэр уустуктартан куттаммат, саллыбат күүстээх санаалаахтара миэхэ холобур буолар.
Сайын бүтүүтэ бырдах арыый да намыраатаҕына, буспут-хаппыт, үлэлээн-хамсаан кииллийбит, улааппыт убайдарым кэлиэхтэрэ. Өссө хамнас аахсан астыныахтара.
Ирма Винокурова, IX кылаас
Орто Халыма, Өлөөкө-Күөл.