Олунньу 20 күнүгэр С.К. Макаров аатынан Чурапчы гимназиятыгар Арассыыйаҕа норуоттар сомоҕолоһуулара, Саха Өрөспүүбүлүкэтигэр Култуура, Чурапчы улууһугар Олохтоох оҥорон таһаарыы сылларыгар аналлаах «Басхан-2026» улуустааҕы дьыалабыай оонньуу буолла.
Быйыл Чурапчы улууһун 9 оскуолатыттан барыта 11 уол кытынна. Кыттааччылар 5 түһүмэххэ бэйэлэрин тургутан көрдүлэр. «Удьуор утума» диэн бастакы түһүмэххэ төрдүлэрин-уустарын билиһиннэрдилэр. Манна кыттааччы төрүччүтүн хас көлүөнэҕэ диэри билэрэ сыаналанна.
«Дойду салайааччылара мин тус бэйэм көрүүбүнэн» диэн иккис түһүмэххэ уолаттар араас кэмҥэ салайа сылдьыбыт дьон туһунан санааларын уонна тугу билэллэрин иһитиннэрдилэр.
«Өркөн өй» түһүмэххэ билиилэрин тургутан блиц-ыйытыыларга хоруйдаатылар. Хас биирдии кыттааччыга 10-нуу араас тургутук ыйытыылары биэрдилэр.
Төрдүс түһүмэҕинэн дьылабыай оонньуу буолла, ол эбэтэр дебат. Уолаттар бэйэлэрин инники олохторугар өрөспүүбүлүкэлэрин, улуустарын, нэһилиэктэрин хайдах сайыннарар былааннарын, баҕа санааларын тула кэпсэттилэр.
«Айыы умсулҕана» түмүктүүр түһүмэххэ кыттааччылар хоһоон устуруокатын тутатына ситэрэн, салҕаан айарга холонон көрдүлэр. Уолаттар ис-истэриттэн дьоҕурдаахтар, талааннаахтар эбит диэн бэлиэтии көрдүбүт. Кылгас бириэмэ иһигэр тутатына уустаан-ураннаан айан сөхтөрдүлэр.
Н.Д. Субуурускай аатынан Болтоҥо орто оскуолатын үөрэнээччитэ Коля Егоров, С.Д. Флегонтов аатынан Хадаар орто оскуолатын үөрэнээччитэ Аристарх Лукин ордук биллиилээх, дойду салайыытыгар суолларын-иистэрин хаалларбыт дьон тустарынан үөрэтиигэ улахан болҕомтолорун уурбуттар.
Уустук түһүмэхтэр кэннилэриттэн муҥутуур кыайыылаах аатын С.К. Макаров аатынан Чурапчы гимназиятын Х кылааһын үөрэнээччитэ Андрей Михайлов ылла. Кини бу аан бастакы кыттыыта.
– Күрэххэ ый аннараа өттүттэн саҕалаан дьарыктаммытым. Нэдиэлэ хаалбытыгар күн аайы 4-түү, 5-тии чаас бэлэмнэммитим. Миэхэ уустук түһүмэҕинэн, политическай диэйэтэллэр уонна дебат буоллулар. Бу күрэх киһини сайыннарар. Тыл-өһү, удьуоргун, утумҥун барытын билэр эбиккин, билииҥ-көрүүҥ да кэҥиир, – диэн Андрей “Тумус кыһа” медиа-киин юнкордарыгар биэрбит интервьютугар санаатын үллэһиннэ.
II үрдэли В.С. Яковлев-Далан аатынан Кытаанах орто оскуолатын Х кылааһын үөрэнээччитэ Арылхан Пономарев, III үрдэли Г.П. Башарин аатынан Сылаҥ орто оскуолатын Х кылааһын үөрэнээччитэ Анатолий Протодьяконов ыллылар.
“Сайдам саҥа Басхана” анал аат хаһаайынынан С.Д. Флегонтов аатынан Хадаар орто оскуолатын Х кылааһын үөрэнээччитэ Аристарх Лукин буолла. “Хомоҕой тыл Басхана” – Эрчим Попов, Н.Д. Субуруускай аатынан Болтоҥо орто оскуолатын Х кылааһын үөрэнээччитэ; “Өркөн өй Басхана” анал аат – Тимур Христофоров, С.А. Новгородов аатынан Чурапчы орто оскуолатын Х «А» кылааһын үөрэнээччитэ; “Кыайыыга дьулуур” – Айхал Охлопков, Д.Г. Барашков аатынан Бахсы орто оскуолатын Х кылааһын үөрэнээччитэ.
Уолаттар бары олус хорсун санаалаахтара, дириҥ толкуйдаахтара, бэлэмнэрэ тута көстөр. Толлубакка, харса суох, олус үчүгэйдик, таһымнаахтык кытыннылар.
Кристина МИХАЙЛОВА, Винея БАРАШКОВА, Х кылаас,
«Тумус кыһа» медиа-киин, С.К. Макаров аатынан Чурапчы гимназията