Бүгүн, алтынньы 10 күнүгэр, Н.К уонна А.Г Чирээйэптэр ааттарынан Дьокуускай куорат национальнай гимназиятыгар «Төрүччү сэһэнэ» төрүччү хайысхатыгар анаммыт тэрээһин буолан ааста. Тэрээһин 3 «Г» кылаас төрөппүттэрин уонна салайааччытын Эжанна Николаевна Яковлева күүстэринэн ыытылынна.
Эжанна Николаевна Яковлева, 3 «Г» кылаас салайааччыта
2023-2024 үөрэх дьылыгар Вероника Николаевна Кобякова уонна Вилюяна Николаевна Никитина гимназия кылаастара бары бырайыактаах буолуохтаахтар диэн этии киллэрбиттэрэ. Ханнык бырайыагы ылабыт диэн муна-тэнэ сырыттахпытына, Татьяна Ильинична Жиркова биһиэхэ «Төрүччү» бырайыагы биэрэр. Көҕүлээччибит кини буолар. Биһиги тута ылсан, сүргэбит көтөҕүллэн, оҕолор ылынан, төрөппүттэрин кытта төрүччүлэрин үөрэтэн барбыттара. Биллэн турар, куорат ыалын түбүгэ баһаам. Онно быыс булан, төрүччүлэрин кылгас кэм иһигэр үөрэппиттэрэ уонна кылаас иһинэн дакылаат истиитигэр бары кэпсээбиттэрэ. Салгыы төрөппүттэр көҕүлээһиннэринэн бу бырайыакпытын хайдах эмэ гимназияҕа тарҕатыахтаахпыт диэн сыал турбута. Быйыл Татьяна Ильинична гимназия иһинэн быыстапкалаах научно-практическай конференция оҥоруҥ диэн сүбэлээбитэ. Бастаан төрөппүттэр ити туһунан тугу да билбэппит диэн мунаахсыйбыттара. Дьолго, алтынньы 8-9 күннэригэр Уһук Илиннээҕи норуоттар төрүччүлэрин форума буоларын билбиппит уонна бу ый 10 күнүгэр «итиилии» тэрийиэххэ диэн сүбэлэспиппит. Айыы кыһатыгар тэриллибит түһүлгэҕэ тиийэн, араас улуустан кытта кэлбит оҕолору көрбүппүт-истибиппит. Бу кэннэ төрөппүттэр харахтара умайан, төрүччүнү араас ньыманан үөрэтиэххэ сөп эбит диэн өйдөөбүттэрэ. Биһиги бу эйгэҕэ, быыстапка тэрийиитигэр саҥа киирбит дьон буолан, «Чуораанчык» сурунаал сүрүн эрэдээктэриттэн Сардана Анатольевнаттан сүбэлэппиппит. Дьүүллүүр сүбэнэн конференцияҕа гимназия төрөппүттэрэ, оттон быыстапкаҕа учууталлар буоллулар.
Бу конференцияҕа бастакы, иккис кылаас оҕолоруттан, биллэн турар, олох хас да көлүөнэни үөрэтэллэрин ирдээбэппит. Сахалыы гимназия буоларбыт быһыытынан оҕо төрөөбүт тылынан, кыбыстыбакка дьон-сэргэ иннигэр кэпсиирин күүтэбит. Дьүүллүүр сүбэ ыйытыыларыгар эппиэттиир буоллаҕына, бастакы кылаас оҕотугар кыайыы буоллаҕа. Оҕолор бары араас таһымнаахтар. Оҕо бүгүҥҥү ситиһиитэ — бу барыта төрөппүт уонна эбэ, эһэ кыһамньыта, үлэтэ дии саныыбын.
Тэрээһин хас да хайысхаҕа арахсан ыытылынна:
1. Быыстапка — оҕолор актовай саалаҕа эһэлэрин-эбэлэрин малларын көрдөрдүлэр, кэпсээтилэр.
Эрхан Габышев, 4 «А» кылаас:
Мин хос эһэм чороон оҥоһуутунан дьарыктаммыта. Үлэтин олус сөбүлүүрэ. Уопсайа сүүстэн тахса чороону оҥорбута. Бу үлэни оҥорорбор ийэм уонна эһэм Петр Попов көмөлөспүттэрэ. Биир эрэ сыл үлэлээтим, салгыы чинчийиибин сайыннаран, араас таһымнаах кэмпириэнсийэлэргэ кыттыам.
Герман Ионов, 3 «Г» кылаас эбэтин музыкальнай инструменнарын көрдөрөр:
2. Урукку устуулар — төрүччү туһунан видеоконкурс:
Сергей Родионов, 1 «А» кылаас. «Утум салҕанар»:
Жанна Сивцева, 1 «А» кылаас, «Удьуор салҕанар»:
Сандаара Зверева, 3 «Г» кылаас, «Сергей Зверев — Кыыл Уола туһунан»:
3. Ыал төрүччүтэ — оҕолор 1,2 уонна 3,4 кылаастарга арахсан төрүччүлэрин туһунан научнай үлэлэрин кэпсээтилэр:
Даниил Скороходкин, 3 «Б» кылаас
Мин дакылаатым аата «Төрүччүнү үөрэтиигэ «FamyTale» приложение көмөтө». Биһиги приложениеҕа Төрүччүбүтүн оҥорбуппут, хаартыскаларбытын, бэйэбит даннайдарбытын киллэрбиппит. Төрүччүбүн 3-с көлүөнэҕэ диэри билэбин. Хос-хос эһэм аата Лыткин Николай Сидорович. Үлэбин өссө сайыннарыам, аҕам өттүнэн төрүччүбүн оҥоруом».
Жанна Сивцева, 1 «А» кылаас, ийэтэ Джулия Егоровна Сивцева
Биһиги проекпыт аата «Мин төрүччүм». Ийэ уонна аҕа өттүттэн 11 көлүөнэҕэ диэри үөрэппипит. Биһиги,бастатан туран, Национальнай архив докумуоннарын хаһыспыппыт. Александр Винокуров историк-архивиһы кытта үлэлэспиппит. Кини биһиэхэ 2 отчуот оҥорон биэрбитэ, Слепцовтар уонна Охлопковтар тустарынан. 2023 сыллаахха Обутовтар аймахтарын ыһыахтара буолбута . Ол онно төрүччүбүтүн бэйэбит илиибитинэн суруйан оҥорбуппут. Тэрээһин наһаа үчүгэйдик ааста, үрдүктүк сыаналаатыбыт, астынныбыт.
Тэрээһин түмүктэрэ:
- Быыстапка — кыайыылаҕынан 4 «А» кылаас үөрэнээччитэ София Борисова буолла.
- Урукку видеолар — 3 «Г» кылаас үөрэнээччитэ Анна Созонова кыайда.
- Ыал төрүччүтэ — 1, 2 кылаас бөлөҕүгэр кыайыылааҕынан Кирилл Шарин, 2 «В» кылаас үөрэнээччитэ буолла. 2 миэстэни , Жанна Сивцева, 1 «А» кылаас, Тая Иванова, 2 «В» кылаас; 3 миэстэни Даша Шестакова, 2 «В» кылаас ыллылар.
keskil14.ru