Дьокуускай куоракка буолан ааспыт Уһук Илин норуоттар төрүччүлэрин форумугар “Кэскил” оҕо бэчээтин кыһатын ыҥырыытынан кыттыыны ылбытым. “Айыы кыһата” национальнай гимназия аактабай саалатыгар буолбут “История дьиэттэн саҕаланар” тэрээһиҥҥэ төрүччүбүн чинчийбит үлэм туһунан кэпсээбитим.
Өрөспүүбүлүкэҕэ төрүччүнү үөрэтэр, бу тиэмэни интэриэһиргиир оҕолору бииргэ түмэр, мунньар тэрилтэбит «Кэскил» буолар. “Кэскил” оҕо бэчээтин кыһатын дириэктэрэ Ольга Ивановна Семенова билиһиннэрбитин курдук, оҕо дьиэ кэргэнин, бэйэтин өбүгэлэрин билэ үөрэнэригэр оҕо бэчээтин кыһата “Төрүччү” диэн бырайыагы хаһыс да сылын үлэлэтэр.
– Үрдүкү кылаас үөрэнээччилэригэр научнай-практическай кэмпириэнсийэлэри ыытарбыт таһынан, кыра саастаах оҕолорбутугар аналлаах “Чуораанчык”, “Колокольчик” сурунаалларга тэттик кинигэлэри таһаарабыт. Онно оҕолор “Дьиэ кэргэним үйэлээх баайа” диэн хос эбэлэрэ, эһэлэрэ тутта сылдьыбыт малларын туһунан кэпсииллэр. Бу тахсыбыт тэттик кинигэлэрин биһирэмин улуустарга, нэһилиэктэргэ тиийэн ыытабыт, – диэн кэпсиир Ольга Ивановна.
Оҕолор билиилэрин өссө кэҥэтэн, чинчийэр үлэнэн өссө дириҥник ылсан дьарыктаналларыгар “Кэскил” оҕо бэчээтин кыһата Билим Дьоҕус академиятын кытта ыкса үлэлэһэн, төрүччүлэрин чинчийэр бастыҥ үлэлээх оҕолору “Инникигэ хардыы” научнай-практическай конференцияҕа кыттарга ыҥырыы биэрэр.
Бу форумҥа сылдьан, төрүччүнэн дьарыктанар оҕолор олус үчүгэй сонуну иһиттибит. Ол курдук Ольга Ивановна иһитиннэрбитинэн, быйылгы үөрэх дьылын Бүтүн Арассыыйатааҕы научнай-практическай кэмпириэнсийэ былааныгар, “Родословие” 6-с хайысхаҕа киирбит. Ол аата оҕолор Арассыыйа таһымнаах кэмпириэнсийэҕэ кыттар кыахпыт өссө улааппыт.
Мин бу фрумҥа эһэм аҕатын төрүччүтүн кэпсээтим. Төрүччүбүн 14 көлүөнэҕэ тиийэ биллим. Иван Иннокентьевич Корякин оҥорбут төрүччүтүн, аныгы үйэ тэтиминэн, “Древо Жизни” программаҕа уопсайа 1000 аймахтарым ааттарын киллэрдим. Бу программа ааптара Дмитрий Александрович Киркинский кэпсээбитинэн, 70000 киһини киллэрбит суруйааччы эмиэ баар эбит. Ону истэн олус соһуйдум, сөхтүм.
Онон биир саастыы оҕолорбун “Кэскил” оҕо бэчээтин кыһата төрдүс сылын тэрийэн ыытар “Память предков. Генеалогия моей семьи” научнай үлэни көрүү куонкуруһугар кыттыҥ диэн ыҥырабын. Үлэлэргитин алтынньы ыйын 31 күнүгэр диэри https://forms.yandex.ru/u/68e4712b068ff02d7d81319b Яндекс дискэҕэ хачайдыыгыт.
Куонкурус туһунан сиһилии https://keskil14.ru/v-yakutii-startoval-respublikanskij-konkurs-nauchno-issledovatelskih-rabot-shkolnikov-pamyat-predkov-genealogiya-moej-semi/
Алгыс ПОПОВ, Х кылаас,
профессор И.М. Романов аатынан
Төхтүр орто оскуолата, Мэҥэ Хаҥалас