Атырдьах ыйын 7 күнүгэр «Энергетик» лааҕырга төрүччүлэрин үөрэтэ кэлбит оҕолорго өссө биир сэргэх көрсүһүү ааста. Оҕолор Дьокуускай куорат иһинэн аан бастакы сырыылара Саха Өрөспүүбүлүкэтин Национальнай библиотекатыгар ааста.
Библиотека дьиэтигэр икки бөлөҕүнэн кэлэ сырыттыбыт. Маҥнай орто саастаах оҕолор этэрээттэрэ, онтон улахаттар иккис сырыынан кэллибит. Биһигини ааҕар дьиэ үлэһиттэрэ олус эйэҕэстик көрүстүлэр. Старшай библиотекарь Лариса Львовна Малая сүрүн саалаҕа оҕолорго библиотека саайтыгар хайдах регистрацияны ааһары билиһиннэрдэ. Оҕолор тутатына төлөпүөннэринэн киирэн саайтка бигэргэниини аастылар.
Салгыы сүрүн библиотекарь Туйаара Васильевна Сокорутова билигин буола турар анал байыаннай операция зонатыгар сулууспалыыр медик байыастарга анаммыт быыстапка туһунан кэпсээтэ. Манна биһиги медик байыастар күннээҕи дьоруойдуу хорсун быһыыларын туоһулуур хаартыскаларын кытары билистибит. «Туртас» диэн позывнойдаах медик кыыс быыһаабыт саллааттарын шевроннарын коллекциятын көрдүбүт. Дьоруойдуу охтубут эдэр медик Владимир Диодоров-Лаврентьев тутта сылдьыбыт малларын, таҥаһын, талисманнарын, суруктарын сэргээтибит.
Историческай саалаҕа сэдэх кинигэлэр салааларын сэбиэдиссэйэ Анна Владимировна Таппырова быйыл Саха Өрөспүүбүлүкэтин Национальнай библиотеката тэриллибитэ 100 сыла буоларын бэлиэтээн эттэ уонна историяны сэһэргиир саала үлэтин тутулун кэпсээтэ.
Салгыы оҕолорго Саха сирин историятын туһунан викторина оонньоттулар. Төрөөбүт дойдутун үчүгэйдик билээччинэн Тааттаттан сылдьар Николай Сыромятников ааттанна. Викторинаны бэлэмнээбит оҕо библиотекатын үлэһитэ Андрей Алтаныров оҕолор төрөөбүт дойдуларын олус үчүгэйдик билэллэрин эттэ.
Көрсүһүү түмүгэр кыраайы үөрэтэр национальнай фонда сэбиэдиссэйэ Лариса Иннокентьевна Кычкина хас биирдии саха киһитэ кимтэн кииннээҕин, хантан хааннааҕын хайаан даҕаны билиэхтээҕин чопчулаан бэлиэтээтэ.
Национальнай библиотека дьиэтигэр экскурсия оҕолорго чаҕылхай өйдөбүл буолан хаалла.
Сиһилии видеорепортажка көрүҥ:
Суруйда юнкор Снежанна Готовцева, Танда орто оскуолатын 9 кылааһын үөрэнээччитэ.
Видеоҕа уһулла Алина Антонова, Маар орто оскуолатын 11 кылааһын үөрэнээччитэ.
Хаартыскаҕа түһэрдэ Снежана Тобонова, Маар орто оскуолатын 10 кылааһын үөрэнээччитэ.
keskil14.ru