Чурапчы улууһугар «Боотур Уус сыдьааннара» муниципальнай программа 2022 сылтан үлэлиир. Сүрүн тосхоллоро Россия Президенэ В.В. Путин ыччаты патриотическай өйгө-санааҕа иитиигэ дойду иннигэр туруорар соруктарыгар, Саха өрөспүүбүлүкэтигэр үлэлиир «Эркээйи эргиирэ» программаҕа тирэҕирэр.
– «Боотур Уус сыдьааннара» программа уопсай тутулун, ис хоһоонун толкуйдуу сылдьар кэммитигэр Төрүччүнү үөрэтии биир хайысха быһыытынан киирбитэ. Улуус хас биирдии оҕото төрүччүтүн билиэхтээх, үөрэтиэхтээх диэн чопчу соругу туруорбуппут. Ол сорук үлэ ханнык көрүҥүнэн ситиһиллиэхтээҕин барытын бу программаҕа аттаран киллэрбиппит. Инньэ гынан уһуйаан саастаах оҕолор ийэлэрин, аҕаларын ааттарын, кинилэр ханна төрөөбүттэрин туһунан чопчу билиэхтээх. Алын кылааска оҕо төрүччү туһунан өйдөбүллээх буолуохтаах, ийэтин, аҕатын өттүттэн үс көлүөнэни билиэхтээх. Орто сүһүөххэ төрдүн-ууһун бэһис көлүөнэтигэр диэри үөрэтиэхтээх. Оскуоланы бүтэрэригэр төрүччүтүн сэттэ көлүөнэҕэ диэри билэр буолуохтаах. Оҕо оскуолаттан саҕалаан төрдүгэр-ууһугар баар чулуу дьонун туһунан төһө кыалларынан билэн-көрөн, олох киэҥ аартыгар үктэниэхтээх. “Боотур Уус сыдьааннара” программа биир сүрүн соруга ити буолар, – диэн кэпсиир Чурапчы улууһун үөрэҕириитин начальнига Юрий Павлович Посельскай.
Бэс ыйын 1 күнүгэр бу программа чэрчитинэн ыытыллыбыт Оҕо аймах Үрүҥ Тунах ыһыаҕар “Мин төрдүм-ууһум – тирэнэр тирэҕим” төрүччү быыстапката буолан ааста.
Юрий Павлович бу тэрээһиҥҥэ үрдүк сыанабылы биэрдэ: “2022 сылтан саҕаламмыт программа улуус уһуйааннарыгар, оскуолаларыгар иитэр үлэҕэ олохтоох миэстэтин булбут диэн астынным. 27 үлэ кыттыыны ылла. Оҕолор төрөппүттэрин кытта төрүттэрин туһунан архыыбы хасыһан, литератураны ааҕан улахан үлэни ыыппыттара көстөр. Төрүччү хайысхатыгар Н.Е. Мординов-Амма Аччыгыйа аатынан “Кэскил” оҕо бэчээтин кыһатын кытта ыытар үлэлэрбит биир ситимҥэ киирбитин көрөммүн үөрдүм. Бу ситимнээх үлэбит кэскиллээх буолуо диэн эрэнэбин”.
Саха төрдүн-ууһун билиэхтээх диэн тирэх өйдөбүл биһиэхэ эппэтигэр-хааммытыгар иҥэн сылдьар. Кэм-кэрдии хаамытыгар ону сүтэрбэккэ, иитии-үөрэтии өттүгэр Чурапчы улууһа сөптөөхтүк аттаран туһана олороро атыттарга холобур эрэ буолар кыахтаах.
– Икки сыл устата биһиги улууспутугар төрүччүгэ оҕолор болҕомтолорун, интэриэстэрин тардыыга үгүс үлэ ыытылынна. Оҕолорбут бу тиэмэҕэ дакылаат суруйан көмүскээтилэр. Быйылгы үөрэх дьылыгар бастакы түһүмэххэ туруорбут сыалбытын-сорукпутун ситистибит. Бу уһуйаан, оскуола дьиэ кэргэни кытта ситимнээх үлэтин түмүгэ буолар диэн сыаналыыбын. Бүгүҥҥү да быыстапкаҕа, бу да иннинэ Төрүччү тиэмэтигэр ыытыллыбыт ааҕыыларга биир төрүттээх-уустаах аймахтар бэйэ-бэйэлэрин булсубуттара. Биһиги программабыт этэринэн, хас биирдии оҕо ханан силистэнэн тахсан, Боотур Уус сыдьаана буоларын билиэхтээх. Түмүгэр Чурапчы улууһун төрдүн-ууһун туһунан информатика учууталларын кытта электроннай портал оҥоһуллуохтаах”, – диэн кэпсиир Юрий Павлович Посельскай.
«ТӨРҮТТЭРБЭР МАХТАНАБЫН«
Төрөппүттэр бэлиэтииллэринэн, “Боотур Уус сыдьааннара” программанан сирдэтэн төрүччүгэ үөрэх управлениетын өттүттэн ирдэбил күүскэ турбута туһалаах буолбут. Оҕо төрүттэригэр-уустарыгар тирэҕирэн анаарар, толкуйдуур, бэйэтигэр түмүк оҥостор, ону барытын киһи буолан үүнэн-сайдан тахсарыгар туһанар кыахтанар.
– Оҕо кыра сааһыттан мин кимминий хантан төрүттээхпиний диэн интэриэстээх улаатара киһи буолан тахсарыгар улахан тирэҕи биэрэр, – диэн этэр төрөппүт Марфа Игорьевна Корякина.
Кини кыыһын Алисаны кытта аҕаларын өттүттэн төрүччүллэрин үөрэппиттэр. Алиса Чурапчы интеранат-оскуолатыгар үөрэнэр. Быйыл бэһис кылааһы бүтэрбит.
– Аҕам Виталий Валерьевич Корякин өттүттэн төрүччүбүн үөрэттим. Кини ыраах Эдьигээн Кыстатыамыттан төрүттээх. Эһэм Валерий Васильевич булчут. Кини төрүттэрэ эмиэ булчуттар, табаһыттар. Төрүттэрбит хоту сир тыйыс айылҕатын кытта алтыһан улааппыт дьон буолан, биһиги аймах ордук спортка сыстаҕаспыт. Аҕам Виталий Валерьевич көҥүл тустууга 2008 с. ХХIX Пекиннээҕи олимпиада кыттыылааҕа. Кини бииргэ төрөөбүт балта Валерия 2008 сыллаахха Дьокуускайга ыытыллыбыт “Азия оҕолорун” оонньууларыгар көҥүл тустууга чемпионнаабыта. Бииргэ төрөөбүт убайым Валера Корякин 2022 сыллаахха Владивостокка ыытыллыбыт “Азия оҕолорун” VII оонньууларыгар көҥүл тустууга, аҕам бииргэ төрөөбүт эдьиийэ Татьяна Валерьевна уола Виталий Корякин ох саанан ытыыга кыттыбыттара. Кыра быраатым Игорь Корякин тустуунан дьарыктанар. Мин бэйэм сүүрэбин, волейболлуубун. Аҕабыт дойдутугар Кыстатыамҥа эһэбитигэр Валерий Васильевичка наар сылдьабыт. Хоту сир биһиэхэ дьулууру, тулууру кыаҕы биэрэр дии саныыбын. Төрүттэрбэр махтанабын, – диэн кэпсиир Алиса Корякина.
Сардаана МАТВЕЕВА,
“Кэскил” оҕо бэчээтин кыһатын кылаабынай эрэдээктэрэ