Дьокуускай куоракка “Энергетик” лааҕырга 21 хонуктаах Төрүччүгэ хайысхалаах үлэбит, үөрэхпит түмүктэннэ. Бэйэбэр элбэҕи арыйдым. Толкуйум кэҥээтэ, дириҥээтэ дии саныыбын. Ордук улахан толкуйу миэхэ Дмитрий Кириллович Титов лекцията иҥэрдэ.
Урукку дьыллар быыстарыттан төрүт өбүгэлэрбит ыраахтан көрөн тураллар. Бу мин ыччатым маннык киһи буола үүннэ дуо диэн үчүгэй буоллаххына киэн тутта, толкуйа суох кураанах киһи буоллаххына хомойо көрөллөрүн харахпар ойуулаан көрдүм уонна үчүгэй киһи буоларга дьулуһуум өссө улаатта.
Дмитрий Кириллович эппитин курдук, туох барыта киһи толкуйуттан тутулуктаах. Холобур, өбүгэлэрбититтэн тиийэн кэлбит саха сылгытын этин аан дойдуга таһаарыахпытын баҕарар буоллахпытына, дириҥ өйдөөх-санаалаах, киэҥ толкуйдаах буолуохтаахпыт. Ол туһунан мин хайдах кэпсиэхпин сөбүн туһунан бэйэм санаабын сыанаҕа тахсан кэпсээтим, бэйэм көрүүлэрбин Дмитрий Кирилловиһы кытта үллэһинним.
Дмитрий Кириллович: “Өбүгэлэрбит биһиэхэ хаалларбыт үс мөл. квадратнай километр иэннээх сирдэрин-уоттарын тумнан тоҕо бары куоракка таас квартираларга талаһар буоллубут?” – диэн эппитэ миигин элбэх толкуйга түһэрдэ.
Биһиги сахалыы тылбытын умнуо суохтаахпыт. Ол туһугар өйбүтүн-санаабытын сайыннарыахтаахпыт. Дмитрий Кириллович: “Өбүгэлэрин ыраахтан көрөн тураннар, эн нууччалыы саҥардаххына, бу мин ыччатым мин өйдөөбөт тылбынан саҥарар, туох диирий кини диэн мунаахсыйар”, – диэн эппитин оҕолор бары да толкуйдуохпутун наада.
Уопсайынан, наһаа туһалаах лааҕырга сылдьан астынным.
Айуол НОВИКОВ, VII кылаас, 2-с Чакыр, Амма