Быйыл сайын З.А. Тихонова аатынан «Түөлбэ» оҕо киинэ эбии үөрэхтээһин тэрилтэтигэр «Сайдыс» сайыҥҥы сынньалаҥ лааҕырыгар оҕолору төрөөбүт сиргэ-уокка, төрүт дойдуларын историятын үөрэтэр сыаллаах-соруктаах үөрэнээччилэр чинчийэр үлэлэрэ ыытылынна. Биир оннук кэрэхсэбиллээх бырайыагынан «Айан педагогиката» диэн төрөөбүт улууспут устун экскурсия буолла.
Экскурсия биир сүрүн уратытынан кыраайы үөрэтэр бизнес-бырайыак иһинэн оҕолор экскурсовод быһыытынан кыттыылара буолар. Бу сырыы дойдубут историятын, биир дойдулаахпыт Саха сирин уһулуччулаах политическай уонна государственнай деятелэ Илья Егорович Винокуров үлэтин уонна олоҕун үөрэтэр, чинчийэр сыаллаах тэрилиннэ.
Айаммыт Намнааҕы педагогическай колледж-Аппааны-И.Е. Винокуров аатынан Хатыҥ-Арыы историяны уонна кыраайы үөрэтэр түмэлэ-Нам хайысханан туһуланна. И.Е. Винокуров ааспыт үйэ саамай ыарахан кэмнэригэр саха дьонун олоҕун гражданскай сэрии, онтон саҥа олоҕу тутуу, Аҕа дойдуну көмүскүүр Улуу сэрии, онтон салгыы дойдуга бүтүннүүтүгэр политическай сатарыйыы, дойдуга личность иннигэр сүгүрүйүү муҥутаан сабардаабыт кэмигэр олорон ааспыта.
И.Е. Винокуров аатын үйэтитии 1996 с. олохтоохтук саҕаламмыта. СӨ Бастакы Бэрэсидьиэнэ Михаил Ефимович Николаев Ыйааҕынан Нам улууһугар Хатыҥ-Арыы орто оскуолатыгар аата иҥэриллибитэ.
2007 с. төрөөбүт дойдутугар И.Е. Винокуров мусуойа аһыллан үлэҕэ киирбитэ. Намнааҕы педагогическай колледжка кини аатынан сквер арыллыбыта. Маны таһынан өрөспүүбүлүкэҕэ суолталаах «Винокуров ааҕыылара» ыытыллаллар.
Экскурсияҕа сылдьан Хатыҥ-Арыытааҕы история уонна кыраайы үөрэтэр мусуой үлэһитэ Людмила Васильевна Петрова оҕо сааһын, олоҕун туһунан сиһилии билиһиннэрдэ. Экскурсовод оҕолор Тиара Нектегаева, Надя Корякина, Дархан Пестерев И.Е. Винокуров туһунан тугу үөрэппиттэрин кэпсээтилэр.
Бу айаммыт оҕолорго саҥа билиини-көрүүнү биэрдэ, чинчийэр үлэҕэ уһуйан, биллиилээх дьоннорбутунан киэн туттар, патриотическай тыыҥҥа иитэр.
Сиһилии эдкордар кэпсииллэрин видеоҕа көрүҥ:
Суруйдулар Надя Корякина, И Д.Винокуров-Чаҕылҕан аатынан Нам начаалынай оскуолатын 4 кыл. үөрэнээччитэ, Дархан Пестерев,5 кылаас, Таира Нектегаева, 4 кылаас Чирээйэптэр ааттарынан Дьокуускай куорат национальнай гимназията.
Салайааччылара: Н.И. Семенова, «Түөлбэ» оҕо киинин эбии үөрэхтээһин педагога, А.П. Слепцов, Хамаҕаттытааҕы саха-французскай лиссиэй обществознание учуутала.