Быйылгы күрэс олус тэрээһиннээхтик барда. Быйыл өрөспүүбүлүкэ араас муннугуттан 17 кыттааччы кэлбит.Быйыл Таатта улууһуттан Ытык-Күөл Алампа аатын сүгэр бастакы нүөмэрдээх оскуолатыттан саха тылын уонна лэтэрэтиирэтин учуутала, Им Галина Фёдоровна кыттан «Лауреат» үрдүк аатын сүгэн ,» бастыҥ медиавизитка» кыайыылааҕынан тахсан үөрүүбүт үрдээтэ. Галина Фёдоровна элбэх эриирдээх-мускуурдаах түһүмэхтэри, эрдээхтик ааһан, умсугутар уран тылы баһылаабыт учуутал буоларын , чахчы да бигэргэттэ.
Ол курдук: «Медиавизитка», «Бастыҥ уруок», «Бастыҥ кылаас чааһа», «Бастыҥ маастар кылаас» түһүмэхтэри ааһан,төрөөбүт төрүт тылбыт кырдьык даҕаны саха народнай суруйааччыта,Николай Егорович Мординов-Амма Аччыгыйа эппитинии: «Саха омук тыла үрүйэ уутун курдук сэргэх, сир симэҕин курдук сиэдэрэй» буолара дакаастанна.
Күрэс бүтэһик күнүгэр инники кыттыбыт кыайыылаахтар ыҥырыллан кэлэн, быйылгы күрэстэһээччилэргэ «Маастар кылаас» көрдөрдүлэр.Олор истэригэ үс Россияҕа кыттыбыт конкурсаннар бааллар. Таатта улууһуттан былырыыҥҥы күрэс Лауреата, «Учууталлар учууталлара» бэлиэнэн наҕараадаламмыт, Игидэй орто оскуолатын учуутала, Ефимова Варвара Константиновна маастар кылаас ыытта.
Күрэс түмүгэр дьүүллүүр сүбэ быһаарыытынан 8 лауреат талылынна уонна «Муҥутуур кыайыылаах» үрдүк аатын «Айыы Кыһата» оскуола учуутала, поэт, Каженкин Рустам Николаевич сүктэ. Кини Бурятияҕа ыытыллар Россия күрэҕэр Саха сирин аатын көмүскүөҕэ.
Им Галина Фёдоровнаны үрдүк ситиһиитинэн итиитик-истиҥник эҕэрдэлиибит. Баҕарабыт кытаанах доруобуйаны, өссө үрдүк таһаарыылаах үлэни.
Сахабыт тыла сайда турдун.
Сайдыа диэн эрэнэбит.
Варвара Ефимова, Таатта.