Бүгүн, тохсунньу 31 күнүгэр, үөрэх үлэһиттэрин Тохсунньутааҕы мунньахтарын түмүктүүр түһүмэҕэр төрөөбүт тылы үөрэтиигэ аналлаах үөрэх платформата сүрэхтэннэ. Саха, эбээн, эбэҥки, чукча, долган уонна дьүкэгиир тылларын үөрэтэр сыаллаах оҥоһуллубут «Төрүт тыллар» https://tt14.ru/home диэн электроннай былаһаакканы С.Н.Донской-II аатынан Үөрэҕи сайыннарар уонна идэни үрдэтэр үнүстүүт дириэктэрэ Ньургун Павлов билиһиннэрдэ.
«2020-2024 сс. Саха Өрөспүүбүлүкэтин судаарыстыбаннай уонна дьиҥ таһымнаах тылларын харыстааһын уонна сайыннарыы» судаарыстыбаннай бырагыраама чэрчитинэн оҥоһуллубут куйаар ситимин ураты хайысхалаах порталын «АА» уонна «Айверс» аһаҕас уопсастыбаннай тэрилтэлэр кыра кэм иһигэр оҥорон таһаардылар. Онтон сүрүн тэрийээччинэн — С.Н.Донской-II аатынан Үөрэҕи сайыннарар уонна идэни үрдэтэр үнүстүүт буолар.
Бу куйаар ситимигэр учууталга, үөрэнээччигэ уонна төрөппүккэ көмөлөһөр сыаллаах оҥоһуллубут методическай посуобуйалары, үөрэх лиэксийэлэрин, уус-уран айымньылары, видео-уруоктары о.да.а. туһалаах матырыйааллары биир сиргэ түмэр, сырдатар уонна үөрэтэр цифровой портал буолар. Аадырыһа: https://tt14.ru/home
Үөрэх уонна наука миниистирэ Ирина Любимова этэринэн, билигин оскуолаларга саха тылын үөрэтии таһынан, эбээн, эбэҥки, дьүкэгиир, чукча уонна долган тыла эмиэ үөрэтиллэр. «Бу саҥа арыллыбыт информационнай-цифровой платформа учууталларга улахан көмөлөөх буолуо уонна хас биирдии төрөөбүт тылы үөрэтээччи уонна тарҕатааччы бу манна киирэн бэйэтин үлэлэрин кытары эмиэ билиһиннэриэ диэн эрэнэбин», — диэн кини этэр.
Төрөөбүт тылга, култуураҕа, атын омуктар төрүт үгэстэригэр харыстабыллаах сыһыан хас биирдиибит ытык иэспит буоларын умнумуоҕуҥ.
keskil14.ru