Түмүк нэһилиэгин олохтоохторо Арассыыйа Дьоруойун үрдүк аатын сүкпүт биир дойдулаахтарын Андрей Николаевич Григорьевы көрүстүбүт.



Кулун тутар 29 күнүгэр «Алгыс» НАК нэһилиэкпит эбээлэрэ алаадьылаан айах тутан көрүстүлэр, уһуйаан оҕолоро, оскуола, техникум үөрэнээччилэрэ, нэһилиэк олохтоохторо чиэстээн, уруйдаан-айхаллаан көрүстүлэр.
Дьоруой үрдүк аатын сүкпүт биир дойдулаахпытыгар Андрей Григорьевка-Тутаҕа тыа сирин түөлбэтин баһылыгын солбуйааччыта Е.Н. Гуляев баҕа санаа бастыҥын анаан нэһилиэк аатыттан убаһа бэлэх бэриллэрин туһунан туоһу сурук туттарда.


Ньурбатааҕы техникум дириэктэри иитии чааһыгар солбуйааччы Е.Х. Афанасьев эҕэрдэ тылын этэн үөрэн туран техникум коллективын аатыттан «В» категориялаах суоппар идэтигэр үөрэнэргэ сертификат туттарда.
Олохтоох мелодист Николай Антонов «Эргиллэн кэлээр» анал байыаннай дьайыы кыттыылаахтарыгар анаммыт ырыатынан Ньурбабыт Дьоруойун Андрей Николаевиһы уруйдаатыбыт, биир дойдулаахпыт, Орден Мужества кавалера, Аҕа дойду көмүскэлигэр, анал байыаннай дьайыыга хорсуннук охтубут уолугар Валентиҥҥа анаан аҕата Валентин Иванов суруйбут хоһоонун мелодиялаан ырыа гынан ыллаан сүрэхтээтэ, куйаарга көтүттэ. Маар орто оскуолатын 7 кылааһын үөрэнээччилэрэ, «Күнчээн» уһуйаан иитиллээччилэрэ ырыанан, музыкальнай нүөмэрдэринэн эҕэрдэлээтилэр.
Бу бэлиэ күҥҥэ Ньурбабыт Дьоруойа Андрей Николаевич нэһилиэкпит тыыл бэтэрээннэригэр Егоров Яков Ивановичка, Гаврильева Мария Григорьевнаҕа ыалдьыттаан Улуу Кыайыы 80 сыллаах үбүлүөйүн мэтээлэрин эҕэрдэлээн туран туттарда.


Бу күн Андрей Николаевич оскуолаҕа, техникумҥа ыалдьыттаата. Дьоруойбут хаһаайыстыба тэринээри сылдьарын истэн, нэһилиэкпит бастыҥ көрдөрүүлээх «Барҕарыы» бааһынай хаһаайыстыба үлэтин билиһиннэрдилэр, бааһынай хаһаайыстыба салайааччыта Егор Егорович Иванов хаһаайыстыба тэринэригэр ситиһиилэри баҕаран икки борооску бэлэх уунна.



Бу курдук олус сэргэх, дьоһун, историческай тэрээһиҥҥэ кыттан олус астынан тарҕастыбыт. Ньурбабыт Дьоруойугар дьоһун олоҕу баҕарабыт, «өрүү инники күөҥҥэ сырыт» диэн алгыс тылбытын аныыбыт.

Нэһилиэкпит дьоно биир дойдулаахтарын истиҥник эҕэрдэлээтилэр, хорсун быһыытыгар махтаннылар, киэн тутталларын биллэрдилэр.
Суруйда Сайыына ТОБОНОВА
Хаартыскаҕа түһэрдэ Авдей Неустроев
keskil14.ru