Саҥа 2025-2026 үөрэх сылыгар балаҕан ыйын 19 күнүгэр З.А. Тихонова аатынан «Түөлбэ» эбии үөрэх киинигэр Нам сэлиэнньэтин «Строительнай» микрооройуонун оҕолоругар үөрүүлээх түгэн тосхойдо. Маҥнайгы кылааска киирэр оҕолорго билиигэ суоллара саҕаламмытын бэлиэтиир бырааһынньык буолан ааста. Тэрээһин сыала-соруга саҥа үөрэнээччилэргэ бэйэ-бэйэлэрин кытта көрсүһэ, «Түөлбэ» оҕо киинин туһунан элбэҕи билэ-көрө, эйэҕэс эйгэни үөскэтэр аналлаах.
Бырааһынньык тэрийээччилэр киирии тылларыттан саҕаланна. Ол курдук «Түөлбэ» эбии үөрэх оҕо киинин директоры үөрэх уонна иитии үлэтигэр солбуйааччыта Ходьуку Намылы Дойду Кыыһа оҕолорго үөрэх, билии киэҥ аартыгар үктэммиттэринэн эҕэрдэлээн туран элбэх ситиһиилэри баҕарда. Салгыы «Строительнай» микрооройуон туөлбэтин салайааччыта Прокопьева Вера Васильевна эҕэрдэлээтэ.
Бырааһынньык бастакы кылаас үөрэнээччилэрин параадтарыттан саҕаланна. Сыанаҕа ыытааччы оҕолор музыканан доҕуһуоллатан бастакы кылааска киирбит оҕолору биир-биир үөрэн-көтөн ыҥырдылар. Бу күн кырачаан оҕолорбутун ырыа, үҥкуу музыкальнай нүөмэрдэринэн эҕэрдэлээтилэр.
Көрдөөх клоун араас куонкурустары уонна оонньуулары тэрийэн оҕолор үөрүүлэрэ үксээтэ.
Уонна хас биирдиилэрэ бэлэхтэри тутан үөрэн-көтөн тарҕастылар.
Бырааһынньык түмүгэр умнуллубат өйдөбүнньүк буолар хаартыскаҕа түстүлэр. Бырааһынньыкка кэлбит оҕолор, төрөппүттэр «Түөлбэ» оҕо киинин куруһуоктарын, студияларын оҕолоро оҥорбут араас оҥоһуктарын быыстапкаларын көрөн дуоһуйа сынньанан бардылар.
Түмүккэ үөрэх саҥа түһүмэҕэр ситиһиилэри, «Түөлбэ» оҕо киинигэр араас куруһуоктарга кэлэн эбии дьарыктанан, талааннарын сайыннаралларыгар баҕардыбыт.
Н.И. Семенова, эбии үөрэх педагога, «Кыраайы үөрэтээччилэр» куруһуок салайааччыта.
keskil14.ru