Биһиэхэ, «Түөлбэҕэ», быйылгы үөрэх дьыла эмиэ элбэх араас интэриэһинэй тэрээһиннэрдээх саҕаланна.
Ол курдук, алтынньы 8 күнүгэр, Эбии үөрэхтээһин педагогтарын күнүнэн салайааччыларбытын эҕэрдэлээтибит уонна бэйэбит оҥорбут открыткабытын туттардыбыт. Музыкальнай нүөмэрдэринэн итиитик-истиҥник эҕэрдэлээтибит. Салайааччыларбыт бэйэлэрэ үөрэтэр куруһуоктарын туһунан кэпсээтилэр.
Бырааһынньык олус үчүгэй сценканан саҕаланна. Сценканы оонньоон көрдөрдүлэр мин бииргэ үөрэнэр кылааһым оҕолоро Рустам уонна Сайдам. Салгыы «Түөлбэ» директора Дьячковская Надежда Гаврильевна үөрүүлээх күнүнэн эҕэрдэлээтэ, бары үтүөнү баҕаран, сөбүлүүр дьарыктаах буоларбытыгар, куруһуоктарга кэлэн суруйтаран дьарыктанарбытыгар ыҥырда.
Мини экопарк педагога Ким Николай Владимирович кроликтары киллэрэн көрдөрдө уонна олус интэриэһинэйдик кэпсээтэ. Кроликтар туһунан элбэҕи биллибит. Мин кроликтары көрөн олус астынным.
Нарыйаан Новгородов,
З.А. Тихонова аатынан «Түөлбэ» эбии үөрэхтээһин оҕо дьоҕурун сайыннарар киин «Кыраайы үөрэтэр» куруһуок 5 кыл. үөрэнээччитэ, Нам улууһа.
keskil14.ru