В.Н. Оконешников аатынан Павловскайдааҕы орто оскуола үөрэнээччилэрэ Доброволец күнүгэр анаммыт «Үтүө кыһын» («Добрая зима») акция чэрчитинэн быстах байыаннай хомуурга барбыт дьиэ кэргэттэригэр көмөнү оҥорон саҕалаатылар.
Халлаан тымныытын аахсыбакка, үөрэх кэнниттэн, бары бииргэ тутуспутунан Анна Владимировна Евсеева дьиэтигэр тиийэммит мууһун кыччатан, сааһылаан, чугаһатан биэрдибит. Үлэ кэмигэр ирэ-хоро кэпсэтэн, күлэн-үөрэн, айылҕабыт ып-ыраас салгынынан тыынан чэбдигирэн кэллибит.
Бу маннык күүс көмө буолар олус туһалаах буолар диэн түмүккэ кэллибит уонна соҕотох олорор кырдьаҕастарбытыгар, көмөҕө наадыйар биир дойдулаахтарбытыгар көмөлөһүөххэ диэн барыгытын ыҥырабыт.
Ньургуйаана ЕГОРОВА, X кылаас үөрэнээччитэ,
Павловскай орто оскуолата.