Төрөөбүт тыл, сурук-бичик дэкээдэтин чэрчитинэн аныгы кэм ааптардарын, суруйааччыларын кытары билиһиннэрэбит. Бүгүн эһиги бэйиэт, суруналыыс, Россия суруйааччыларын сойууһун чилиэнэ, «Далбар Хотун» сурунаал сүрүн эрэдээктэрэ Зинаида Архипова билиҥҥи олоҕу ойуулуур саҥа хоһоонун кытары билсиэххит.
Эн аатырар
Үс харахтаах айпуонуҥ,
Сүрэххэр ыксары тутар
Сыаналаах төлөпүөнүҥ
Хантайар халлааҥҥа
Кыркаҕы кыҥаан булар
Кыраҕы мегапикселлэрэ,
Бу тырымныы турар
Тыыннаах түгэн
Илигириир итии нэҥирин,
Тыгыалыыр тымырын тэбиитин,
Таайтарар кистэлэҥ эйгэтин –
Саараама, тиэрдибэттэр!
Кута суох кураанах пикселлэр.
***
Мин турабын
Сүүрбэ биирис үйэ
Халыҥ хаардаах сиһигэр,
Үрдүбэр дьиримниир спутниктар
Аан дойдуну ситимниир
Иилэрин иһигэр.
Бу дьикти үйэ
Көҥүл куттаах сэһэнин
Ытыһым иһигэр ааҕабын,
Орто дойду омуннаах олоҕун
Сиэппэр укта сылдьабын.
Мин санаам,
Тыл буолан тиһиллиэн иннинэ
Уоттааҕар түргэнник
Эйиэхэ иһиллэр,
Мин тылым,
Дорҕооно төрүү илигинэ
Саҥата суох
Мэйиигэр эҥсиллэр.
Сыыппара үйэ
Хаардаах систэрин быһа
Уот хайыһарбынан сыыйабын,
Хайалары курдаттыы,
Байҕаллары уҥуордуу
Эйигин булаары ыксыыбын.
Уонна,
Кырдьык-сымыйа сурахтаах
Тыһыынчанан мичээр быыһыттан
Эн хардааччы харахтаргар иҥнэбин…
Өй-сүрэх ытыллар буурҕатын
Бурулҕаныгар эриллэбин.