Олохпут кэмэ — кэрчигэ олус түргэнник, балысханнык сайдар. Компьютер, гаджет, цифровой өҥө көмөтүнэн хас биирдии киһи күнэ саҕаланар, олохпут кыһалҕата быһаарыллар. Оҕолорбут, ыччаттарбыт бары кэриэтэ кыра эрдэхтэриттэн ураты көрүүлээх, сатабыллаах, сыыппара эйгэтигэр улааталлар. Ол да иһин буолуо, билигин сыыппара эйгэтэ күүскэ өтөн киирдэ, саҥа сүүрээннэр түргэнник сайдаллар, биһирэнэллэр. Оннооҕор бүттүүн аан дойду сололоохторо өйүүллэр. Ол олус хайҕаллаах!
Сэтинньи 25-26 күннэригэр Дьокуускай куоракка “Цифровой алмаз” федеральнай форум чэрчитинэн араас тэрээһиннэр буолан аастылар. Быйыл бу форумҥа 1139 киһи 63 Россия араас регионнарыттан кыттыыны ыллылар. Үгүстэрэ кэтэхтэн кытыннылар.
Саамай күүтүүлээх, кэтэһиилээх түгэн дойдуга туһалаах, сайдыыга тирэхтээх дуогабардары бигэргэтэн, бэйэ икки ардыгар илии тутуһуу буолар. Мантан сиэттэрэн өссө саҥа, сонун бырайыактар олоххо киириэхтээхтэр.
“Цифровой алмаз” форум иһинэн ыытыллыбыт “HACK-NHE-ICE 4.0” хотугулуу-илиҥҥи Хакатон бырайыакка “Кэскил” оҕо бэчээтин кыһата көхтөөхтүк кыттынна. Дьүүллүүр сүбэҕэ, дириэктэр, Ольга Ивановна Семенова кыттыыны ылла.
Бу бырайыакка уопсайа 389 хамаандаттан, сыыйыллан 102 хамаанда бастыыр туһугар кииристэ. Хас биирдии спонсор бэйэтэ трек арыйан үлэлэттэ. Ол иһигэр «Кэскил» оҕо бэчээтин кыһата эмиэ спонсорынан кытынна. Хамаандатыгар 30-тан тахса кыттааччы маҥнайгы миэстэ туһугар үлэлээтэ.
“Кэскил” оҕо бэчээтин кыһата бэлиэтии көрбүт кыайыылааҕар Ньурба улууһуттан «NRBteam» IT-PARK ураты көрүүлээх, сонун идеялаах хамаандатыгар спонсор буолла.
Талбыт хамаандатын кытта кэскиллээх бырайыактарыгар бииргэ үлэлиири күүскэ ылсыаҕа.
Нюргуяна Захарова.