Ахсынньы 13 күнүгэр Майатааҕы В.П. Ларионов аатынан орто оскуола 115 сылын көрсөр үөрүүлээх күнэ буолан ааста. Бу күн араас сылларга үлэлээн ааспыт ытыктабыллаах учууталларбыт, үгүс көлүөнэ выпускниктарбыт кэлэн уруккуну-хойуккуну санаһан, үөрэн-көтөн, ыалдьыттаан аастылар.
Бу үөрүүлээх күн оскуолабыт бэйэтэ оҥорон таһаарбыт “Майа куолас” бурдук бородууксуйатын сүрэхтэниитэ буолла. В.П Ларионов аатынан Майа орто оскуолатыгар тыа сиригэр оҕону үлэнэн иитиигэ болҕомто ууран, бу саастан оскуолабыт салалтата уонна Афанасий Борисов салайааччылаах “Куолас” тыа хаһаайыстыбатын кээпэрэтиибэ кыттыһаннар сэлиэһинэй бурдук ыһан боруобалаан, күн-дьыл этэҥҥэ туран, 1 гектар сиргэ 990 киилэ бурдук ылыллан, бурдук үүнүүтэ этэҥҥэ ааһан, үлэ үтүө түмүктэрдээх буолан “Майа куолас” оҥоһуллан таҕыста.
Биһиги оскуолаҕа үгэс буолбут өр сылларга үлэлээбит учууталлар ааттарын кинилэр үлэлээн ааспыт кэбиниэттэригэр иҥэрии үөрүүлээх чааһа буолла. Ол курдук, Майа оскуолатын бэтэрээн учууталларын, РСФСР норуотун үөрэҕириитин туйгуна, РСФСР оскуолатын үтүөлээх учуутала Симон Андреевич Олесов аата 307 кэбиниэккэ, Российскай Федерация уопсай үөрэҕириитин бочуоттаах үлэһитэ, СӨ үөрэҕириитин туйгуна, СӨ Учууталлар учууталлара Василиса Кузьминична Никифорова аата – 204 кэбиниэккэ үйэтитэн иҥэрилиннилэр.
Д.Ф. Ходулов аатынан норуот айымньытын дьиэтигэр “Сырдык уоттаах кыһабыт” үөрүүлээх чааһыгар оскуолабыт оҕолоро, учууталлара эҕэрдэ нүөмэрдэрин бэлэхтээтилэр, үгүс ситиһиилэрдээх учууталларбыт наҕараадаланнылар уонна күндү ыалдьыттарбыт бэйэлэрин эҕэрдэлэрин тиэртилэр. Бу үөрүүлээх күҥҥэ бары наҕараадаламмыт учууталларбытын итиитик-истинник эҕэрдэлиибит!
Күндү ыалдьыт буолбут, үөрүүбүтүн үллэстибит выпускниктарбытыгар, үлэлээн ааспыт учууталларбытыгар барҕа махтал!
Инникитин да оскуолабыт сайдан иһиэ, аата үтүөтүк ааттаныа, хас биирдии үлэһит ураты суолун-ииһин хаалларыа, үөрэнээччилэрбит ситиһиилэринэн үөрүүбүт үксүө, кэлэр көлүөнэ ааспыты махтана ахтыа, саҥа үйэ саҥа ырыата-хоһооно ыллана туруо!
Сиһилии видео-матырыйаалга көрүҥ:
Уйгулаана Романова, «Мэҥэбил» пресс-киин салайааччыта, Майа, Мэҥэ Хаҥалас