Балаҕан ыйын 19 күнэ – Чурапчыга кэриэстэбил күнэ. Аҕа дойду Улуу сэриитин сылларыгар Чурапчы улууһун хоту улуустарга көһөрүллүүгэ ыыппыттара.
Мин дьиэ кэргэммин көһөрүллүү эмиэ таарыйбыта. Хос эбэм Дьячковская Дария Яковлевна бииргэ төрөөбүттэрин, ийэтин, ииппит аҕатын кытта Кэбээйи улууһугар Мукучуга тиийэн балыктаабыттар. Бу туһунан интэриэһиргээн 3 кылааска сылдьан доклад суруйбутум.
Кэриэстэбил күнүгэр биһиги С.А.Новгородов аатынан орто оскуола 7 “в” кылаас оҕолоро кылааспыт салайааччытын кытта “Айылгы” норуот айымньытын дьиэтигэр баран “Сырдык сарсыҥҥы туһугар” диэн спектакль көрдүбүт.
Спектакльга Аҕа дойду сэриитэ көстөр. Сэрии саҕаланыытыттан Кыайыы буолуор диэри биир кылаас оҕолорун туһунан көрдөрдүлэр. Мин бастакыбын маннык театр сыанатыгар спектакль көрдүм. Олус сөбүлээтим. Эрдэ наар киинэ эрэ көрөр этим. Артыыстар аттыгар тыыннаахтыы сылдьан оонньууллара наһаа интэриэһинэй эбит. Спектакльга баар онус кылаас оҕолорун наһаа аһынным. Ордук фашистар билиэн ылбыттарыгар долгуйдум.
Спектакльга биһиги оскуолабытыттан 4 уонна 10 кылаас оҕолоро кыттыбыттар. Элбэх баҕайы киһи оруолларыгар киирэн сыанаҕа оонньоон көрдөрбүттэрин киһи долгуйа көрөр эбит. Маны барытын Ольга Ноева диэн культура үлэһитэ салайан туруорбут.
Сэрии алдьархайа хаһан да хатыламматыгар баҕарабын, оскуола үөрэнээччилэрэ, кыра оҕолор, улахан дьоннор, кырдьаҕастар куруук үөрэ-көтө сылдьалларыгар баҕарабын.
Артем Седалищев, VII кылаас үөрэнээччитэ
С.А.Новгородов аатынан Чурапчы орто оскуолата