Тохсунньу 29 күнүгэр Эбээн-Бытантай улууһун Кустуур орто оскуолатын дьиэтэ уокка былдьанна. Оскуола кэллэктиибэ ыраах хоту олоробут диэн толлон турбакка, оҕолоро-ыччата үөрэхтээх дьон буоларын туһугар бары кыаҕын, санаатын ууран, үөрэнээччилэргэ сөптөөх усулуобуйаны тэрийэн, тигинэччи үлэлии олорбуттара. Инники элбэх былаан, сорук баара. Быйыл оскуоланы бүтэрээри сылдьар 11-c кылаас үөрэнээччитэ Надя Колесова суруйар.
Тохсунньу 29 күнэ биһиги өйбүтүттэн аны хаһан даҕаны умнуллубат хомолтолоох түгэн ыар күлүгүн түһэрдэ. Ол — тугунан да уратыта суох тохсунньу тоһуттар тымныылаах күнэ этэ. Таһырдьа –54 гыраадыс тымныыны көрдөрөн турара. Оҕолор дистанционнай ньыманан үөрэнэр буолан, оскуола иһэ — уу чуумпу. Учууталлар кылаастарыгар олорон үлэлииллэр. Бу күн бүтүн нэһилиэк бүттүүн олоҕо уларыйыа диэн ким да таайан да, түһээн да көрбөтөҕө… Киһи үөйбэтэх-күөйбэтэх оттүттэн алдьархай быһылаан буолла.
И.Н. Слепцов аатынан Кустуур орто оскуолата кыл түгэнинэн күл-көмөр буолан, уокка былдьанан хаалла… Хаарыан оскуолабыт агропрофилированнай хайысхалаах, «500 лучших сельских школ России» титуллаах, Россия Ассоцияциятын сойууһун «Агрошколы России» чилиэнэ, «Мэрлэнкэ» кочевой школа статустаах, Норуоттар икии ардыларынааҕы Макаренко онлайн форумун 1 миэстэлээх кыайыылааҕа этэ. Дириэктэр Анна Егоровна Никитина «Эффективный руководитель» Россиятааҕы таһымнаах Знак үрдүк наҕараадалаах.
Учууталларбыт Россия куонкурустарын, күрэхтэрин I степеннээх лауреаттара, кыайыылаахтара. Кинилэр дууһаларын ууран туран, бэйэлэрин ураты эскизтэринэн тупсаҕайдык оҥорбут эбээн тылын кэбиниэтэ Россиятааҕы күрэххэ бириистээх миэстэлээх этэ. Омук тылын , алын сүһүөх кылаастар, элбэх оборудованиелаах технология кэбиниэттэрэ олоччу умайдылар,нуучча тылын кэбиниэтэ күүскэ эмсэҕэлээтэ. Көрүдүөргэ ыйанан турбут историяны кэпсиир тупсаҕай оҥоһуулаах элбэх стендэлэрбититтэн эмиэ маттыбыт..
Оскуолабыт элбэх ситиһиитинэн «Энциклопедия агрошкол России» киирбитэ, киэҥ далааһыннаах үлэтин туһунан элбэх публикациялар Россия, өрөспүүбүлүкэ бэчээтигэр элбэх тахсыбыта. Көс оскуолабыт үлэтэ, оҕолор национальнай күрэхтэрин туһунан ыстатыйалар атын дойду сурунаалыгар тахсыбыта. Былырыын олимпийскай чемпион Павел Павлович Пинигин кэлэ сылдьан, оскуолабытын кытта дуогабардаах «Кочевник» таба родовой общинатын туһунан киинэни оҥорон, НКИХ «Саха» 5 биэриини көрдөрбүтэ.
Туох баар ситиһиибитигэр олук буолбут киэн туттар оскуолабыт биир түгэҥҥэ суох буолан хаалла. Өрөспүүбүлүкэ үрдүнэн биир тарбахха баттанар үчүгэй үлэлээх, элбэх ситиһиилээх оскуолабыт уокка былдьаммытан билиҥҥэ диэри итэҕэйиэ суох курдукпут…
…Киэһээ 5 чааска баһаар турбутун истэн, ким кыанар бары сүүрэн тиийтибит. Баһаар улаата илигинэ, малы-салы таһырдьа соһон тастыбыт. Хабыс-хараҥа, туох да сүгүн көстүбэт, күрүдүөр муостата барыта уу. Ол да буоллар, кэлбит дьон ким да туран хаалбакка, бары туох кыалларынан күүс-көмө буоллулар…
Бастаан спортсаала үрдэ умайа турара, уот кыра курдуга, ол иһин бары бүтэһигэр диэри барыта былдьаныа суоҕа диэн эрэллээх турбуппут. Бөһүөлэккэ баһаарынай чааспыт суох буолан, умулларыыга сүүрэн-көтөн, төһөлөөх да көлөһөнү тохпуппун иһин, быыһыыр кыахпыт суох этэ.
Тупсаҕай оҥоһуулаах, сынньалаҥ сирдэрдээх, минньигэс ас сытынан дыргыйар остолобуойдаах, эти-хааны эрчийэр спортсаалалаах, күөх үүнээйилэрдээх «тыыннаах» муннуктаах, онно, бэл, кырачаан фонтаннаах, оҕо чуор куолаһынан чугдаара, сырдыгынан сыдьаайа турбут оскуолабыт барахсан түргэн баҕайытык, көрөн турдахпытына, уокка былдьанна, күл-көмөр буолан хаалла. Бары оҕолор, учууталлар, төрөппүттэр олус харааһынныбыт, аһыйдыбыт.
Биһиги, үөрэнээччилэр, араас таһымнаах күрэхтэргэ ситиһиилэнэн, үөрүү — көтүү үктэллээх, үчүгэй сонуннаах оскуолабытыгар тиэтэйэн-саарайан тиийэрбит … Аны тапталлаах оскуолабыт көрүдүөрүн устун үөрэ-көтө сүүрбэппит, кыһамньылаахтык оҥоһуллубут кылаастарга үөрэммэппит. Аны бу оскуола иһигэр чуораан тыаһа ой-дуораан буолан иһиллибэт. Аны оскуоланы бүтэрээччилэр оҕо саастарын кытта быраһаайдаһар киэһэлэрэ, банкеттара ол бэйэлээх кыраһыабай оскуолабытыгар тэриллибэт.
11 сыл тухары билии биэрбит, сырдыкка угуйбут, билии киэҥ суолугар сирдии турбут тапталлаах оскуолабытын өйдүү-саныы сылдьыахпыт, үөрэхпит кыһата барахсан…
«Эбээн-Бытантай национальнай улуус» муниципальнай оройуон» дьаһалтата баһаартан эмсэҕэлээбит И. Н. Слепцов аатынан Кустуур орто оскуолатыгар үбүнэн-харчынан көмө оҥороргутугар көрдөһөр.
Реквизиты для юридических лиц:
УФК по РС(Я) (муниципальное образование «Эвено-Бытантайский национальный улус (район) Республики Саха (Якутия), л/с 04163208460)
ИНН 1432111912 КПП 143201001
Банк получателя: ОТДЕЛЕНИЕ — НБ РЕСПУБЛИКА САХА (ЯКУТИЯ) БАНКА РОССИИ//УФК по Республике Саха (Якутия) банка г. Якутск
БИК: 019805001/40102810345370000085
р/с 03100643000000011600
ОКТМО: 98659000
КБК: 050 2 07 05030 05 0000 150 прочие безвозмездные поступления в бюджеты муниципальных районов.
Для перечисления физических лиц:
89644289979 мобильный банк, получатель Мария Алексеевна Горохова.
Номер карты Гороховой М. А. 4276760015515735
Номер счета Гороховой М. А. 40817810176000203531 ПАО «Сбербанк»
keskil14.ru