Балаҕан ыйын бастакы күнүгэр Чурапчы улууһун Хадаар орто оскуолатыгар саҥа үөрэх дьылын арыллыытын бэлиэтээтибит. Билии күнүн үөрүүтүн нэһилиэк салалтата, оскуола коллектива, олохтоохтор бары бииргэ үллэһиннибит.
Быйыл бастакы кылааска 8 үөрэнээччи киирдэ. Кинилэри учууталлара Сата Ивановна Ноева үөрэ-көтө көрүстэ уонна алын кылааһы бүтэртэхтэригэр диэри үөрэтиэҕэ.
Оскуолабытыгар быйыл уопсайа 96 үөрэнээччилээхпит. Биһиги оскуолабытыгар атын улуустартан 5 саҥа учуутал үлэлии кэллэ.
«Азия оҕолоро» 8-с спортивнай оонньууларга кыттыбыт оскуолабыт 9-с кылааһын үөрэнээччитигэр Айтал Григорьевка улуус баһылыга С.А. Саргыдаев харчынан бириэмийэни туттарда.
Үөрүүлээх тэрээһин оскуола активын флешмобунан, кылаас-чаастарынан түмүктэннэ.
Иванна НИКОЛАЕВА, IX кылаас, Алена КСЕНОФОНТОВА, VIII кылаас,
С.Д. Флегонтов аатынан Хадаар орто оскуолата, Чурапчы