Кустуур орто оскуолатын үөрэнээччилэрэ күһүҥҥү сынньалаҥнарын туһалаахтык атаардылар. Төрөппүттэр оҕолорго аналлаах көрдөөх-нардаах оонньуулары ыыттылар, онтон эбии үөрэхтээһин учууталлара хомуска оонньооһуҥҥа маастар-кылаас көрдөрдүлэр.
— «Дьүрүһүй алыптаах хомуһум» диэн тэрээһиҥҥэ хомуска араас ньымаларга оонньуурга үөрэттим уонна түмүгэр оһуохайынан түмүктээтибит. Бу маастар-кылааска бэрт элбэх киһи сырытта, аҕа көлүөнэттэн эдэр көлүөнэҕэ диэри бары дуоһуйан-сынньанан бардылар», — диэн Зинаида Анатольевна санаатын үллэһиннэ.
Эдэр эрчимнээх учууталбыт, үҥкүү куруһуогун салайааччыта Вера Михайловна оҕолорго флешмоб үҥкүүтүн ыытта. Оҕолор санааларынан үҥкүү диэн дьон саамай художественнай талаана буолар, оҕо кыра эрдэҕиттэн үҥкүүнэн эрэ буолбакка, ритмиканан эмиэ дьарыктаныахтаах. Үҥкүү киһи доруобуйатыгар, тас көрүҥэр олус туһалаах, үҥкүүлүүр киһи осанката, сиһэ көнө буолар, имигэс буолар диэн санаатын үллэһиннэ. Флешмоб үҥкүү кэннэ түмүккэ хотугулуу үҥкүүнэн сээдьэнэн түмүктээтибит. Биир саамай туһалаах маастар-кылааһы өр сылларга технолог учууталынан үлэлии сылдьар Валентина Николаевна Колесова ыытта, кини маастар-кылааһыгар эдэрдиин, саастаах да көлүөнэ кыбытык тигиитигэр үөрэннилэр. Валентина Николаевна ыыппыт маастар-кылааһа олус сэргэхтик барда. Билиигит-көрүүгүт сатабыллаах, тупсан, илиигит, өйгүт-сүрэххит талаана өссө кэҥээн-тэнийэн, эбиллэн-арыллан истин диэн Валентина Николаевна бэйэтин алгыһын тиэртэ.
Вова Попов, «Биракчаан» медиакиин корреспондена, Кустуур орто оскуолата.