Биһиги 3-үс кылаас үөрэнээччилэрэ кылааспыт салайааччытыныын бөһүөлэктэн тэйиччи баар «Чоҥкуйа» учаастагар сылгыһыттарга баран кэллибит. Биһигини мин эһэм Владимир Николаевич уонна Алексей Алексеевич икки буранынан илдьэ сырыттылар.
Бу учаастакка сылгы баазата баар. Итии-кутуу дьиэ, баанньык, гараж баар. Телевизор, интернет ситимэ, телефон сибээһэ барыта баар. Манна биһигини сылгыһыттар Винокуров Афанасий Иванович, Винокуров Иннокентий Михайлович уонна ветеринар Третьяков Василий Петрович үөрэн-көтөн көрсүбүттэрэ. Чоҥкуйаҕа сылгы базатыттан эбии быйыл саҥа бизоннары аҕалан иитэллэр. Биһиги сылгылары, бизоннары көрбүппүт. Саҥа тиийбит сирбитигэр саха сиэрин тутуһан, алаадьынан сирбитин-уоппутун аһатан баран оонньоон, сибиэһэй салгыҥҥа сүүрэн-көтөн күммүтүн билбэккэ аһарбыппыт.
Сылгыһыт идэтэ олус ыарахан. Кыһыннары, сайыннары күн аайы үлэлиир үлэ эбит. Мин эһэм Сивцев Иннокентий Иннокентьевич үйэтин тухары сылгыга үлэлээбитэ. Кини 67 сыл устата сылгы мииниилээх бастаан сылгыһытынан, онтон сылгыһыттарга наставнигынан үлэлээн ааспыта. Кини элэккэй майгылаах, күүстээх санаалаах, куруук көмөлөһөргө бэлэм майгылааҕыттан кинини бары сөбүлүүллэрэ.
Сылгыһыт идэтин тулуурдаах, күүстээх санаалаах эрэ киһи үлэлиэн сөп эбит диэн өйдөөтүм. Эһэм талан ылбыт идэтин сөбүлээн үйэтин тухары үлэлээбит, кини туһунан үчүгэй өйдөбүл хаалбытыттан олус киэн тутуннум. Эһэм курдук буоларга кыһаллыам.
Бу умнуллубат үтүө сырыыны бэлэхтээбит учууталбытыгар, төрөппүттэрбитигэр, сылгыһыттарга махтанабыт.
Сулустаан Ильин, 3 кылаас
Өлөөкө-Күөл бөһ., Орто Халыма.