Ахсынньы 18 күнүгэр оскуолабыт 10-с, 11-с кылааһын уолаттара Акулина Егоровна Осиповаҕа мас хайытан, «тимуровскай» үлэни оҥордулар. Акулина Егоровна дьиэтигэр соҕотоҕун олорор. Саастаах буолан дьиэтин тас үлэтигэр ыарырҕатар. Оскуолабыт уолаттара ону өйдөөн, кырдьаҕас киһи кыһалҕатыттан туора турбакка көмөлөһөллөр.
Үөрэхтэрин кэнниттэн 50 кыраадыс тымныыга түмсэ түһэннэр, Акулина Егоровнаҕа сылаас сыһыаннарын анаатылар, үөрэ-көтө көмөлөстүлэр.
Биһиги оскуолабыт улахан кылааһын уолаттара кыһын, күһүн, саас, сайын да буоллун бу курдук бииргэ тутуспутунан сылдьан, нэһилиэк кырдьаҕас олохтоохторугар, саастаах дьоҥҥо бэйэлэрин баҕаларынан көмөлөһөллөр. Ким туох ыарахаттары көрсөрүн барытын билэллэр, дьон кыһалҕатын чугастык ылыналлар. Онон үтүө санаалаах уолаттарбыт дьоҥҥо көмөлөрө тохтообот.
Виталий ОРЛОВ, IX кылаас,
С.Д. Флегонтов аатынан Хадаар орто оскуолата, Чурапчы