Сыаҥааннаахха үс бөлөҕүнэн «Эйгэ» лааҕыр үлэлээтэ – «Непоседы» (сал. Павлова Айталина Федоровна), «Үнүгэс» – орто сүһүөх оҕолоругар (Левина Дария Петровна), «Сайдыы» – VIII-XI кылааска (Стручкова Екатерина Николаевна) оҕолору үгүскэ үөрэттилэр, угуйдулар. Салайааччыбыт Садовникова Елена Ивановна. Асчыттар — Левина Татьяна Михайловна, Слепцова Агафия Ивановна, Полушкина Евдокия Васильевна.
Инники «эрэллэрбит»
«Непоседы» оҕолоругар элбэх интэриэһи тардар тэрээһиннэр ыытылыннылар. Аля Нутчина учууталларга көмөлөһөн, көрдөөх, туһалаах оонньууларынан оҕолору сэргэхситтэ. Оҕолор баһаатайдарын олус сөбүлээтилэр. Эрэнэр киһилэрэ буолла.
Мин «Литературное творчество» куруһуогу ыыттым. Инникитин бу оҕолор «Эрэл» хаһыат эдэр кэрэпэдьиэннэрэ буолуохтара дии. Самсонова Айгуляны, Ефимов Диманы, Соломова Аринаны, Николаева Алинаны дьарыктаатым. «Кэскил», «Хотугу Кыым», «Эрэл» хаһыаттар тутулларын, ыстатыйалары билистилэр, үөрэннилэр.
Айгуля, Алина доҕотторун туһунан, Арина нууччалыы остуоруйалары, Дима сонуннары суруйалларын ордороллор. Биирдиилээн темаларга санаа атастаһыытын тэрийдим. Холобур, «Лидер диэн кимий?». Сотору оскуола лидердэрэ буолуохтара. Кинилэр оскуолаларын көрөр-истэр, салайсар дьиҥнээх лидердар буолуохтарын баҕарабын.
IV кылаас үөрэнээччитэ Арина Соломова санаатын үллэстэр:
Мин сайыҥҥы сынньалаҥмар «Непоседы» диэн оҕо площадкатыгар сылдьан туһалаахтык атаардым. Онно уопсайа 15 оҕо сырытта, салайааччыбыт Павлова Айталина Федоровна.. Хас күн ахсын атынтан атын, интэриэһинэй тэрээһиннэр буоллулар: «День девочек», «День Нептуна» уо.д.а. Саамай сөбүлээбит күнүм – кыргыттар күннэрэ, онно мин бастакы миэстэ буолбутум уонна «День музыки» (дискотека буолбута). Онно барытыгар баһаатайбыт Нутчина Аля ыытарга көмөлөспүтэ. Лааҕыр иһинэн литературнай кружокка сырыттым. XI кылаас үөрэнээччитэ Садовников Эльдар дьарыктаата. Биһигини кини хаһыакка хайдах ыстатыйа суруйарга, араас остуоруйалары бэйэбит айан суруйарга үөрэттэ. Мин сайыҥҥы лааҕыры наһаа сөбүлээтим. Бэйэбэр элбэх туһалааҕы биллим, дуоһуйа сынньанным.
Үүнэр аналлаах «Үнүгэстэр»
«Үнүгэс» лааҕырга учууталбар Дария Петровнаҕа көмөлөһөн, баһаатайдаатым. Манна 12 оҕо бу күннэргэ саҥа арыйыыларынан, кыайыыларынан дуоһуйан, астына сынньаннылар.
Лааҕырбытыгар «Перевертыш», «Рекорд күнэ», «Дыгын оонньуулара», киинэ – викторина, дуобакка күрэх, «Мисс» уонна «Мистер Лето – 2020», «Кулинария күнэ» аастылар.
VI кылаас үөрэнээччитэ Ньургустан Аммосов киинэ викторинаҕа кыайбыта. Киинэ аатын, режиссердарын, геройдарын кытта билэрэ сөхтөрөр. Инесса Павлова уонна Настя Сергеева бэйэлэрэ бүччүм олорон дьарыктанан, кумааҕылары тиһэн, хас биирдии сирэйигэр уруһуйдаан, кинигэ курдук оҥордулар. Суруктуур, остуоруйа эбэр буоллар бэйэ оҥорбут бэртээхэй кинигэ буолуо этэ.
Слава Михайлов, Толя Полушкин – кэскиллээх спортсменнар!
Слава лааҕырга 6 уолаттартан «Дыгын оонньууларын» кыайыылааҕа уонна «Мистер Лето – 2020» үрдүк аат хаһаайына буолбута! Кини волейболлуур, тустар, дуобаттыыр. Тустууга атахха сымсатык киирии албастарын таба туһанар. Оскуола иһинэн ыытыллыбыт дуобат күрэҕин кыайыылааҕа, теннис күрэҕин призера, тустууга ыйааһыныгар чемпион. Уол кырачаан балтын көрөр, төрөппүттэригэр күүс – көмө буолар.
Толя «Үнүгэс лааҕыр рекордсмена» анал аат хаһаайына уонна дуобат күрэҕэр чемпион буолбута! Кини өссө уруһуйдуур. Кинилэр улаатаннар, оскуолабытын көрүөхтэрэ, аатын ааттатыахатара, үгүс тэрээһиҥҥэ кыттыахтара, кыайыахтара!
Бастыҥтан бастыҥнар
Спорка эрэ буолбакка, ханнык баҕарар үлэҕэ, дьарыкка дьулуурдаах буолуу ирдэниллэр. Хас биирдии киһи олоҕор туох баар күүһүн ууран туран үлэлээтэҕинэ үгүһү ситиһэр кыахтаах. Кыайыы чэпчэкитик кэлбэт. Ону барытын толорорго элбэх көлөһүнүҥ тохтуон, элбэх мэһэйдэри ааһыаххын наада. Ол курдук, VIII-XI кылаас үөрэнээччилэрэ кыраларыттан спорка бастыҥнарын дакаастаан, бу спортивнай лааҕырга сырыттылар.
«Сайдыы»лааҕыр учуутала Стручкова Екатерина Николаевна маннык этэр:
Лааҕырга алтыспын үлэлээтим. 15 оҕо сырытта. Наһаа үчүгэйдик сынньаннылар, бириэмэлэрин туһалаахтык атаардылар. Оҕолорго анаан араас күрэхтээһилэр ыытылыннылар. Ол курдук, остуол тенниһэ, көрдөөх стартар, сахалыы остуол оонньуулара, дартс, нон-стоп. Уолаттар орто звенону кытта кыттыһан футбол оонньоотулар.
Ренат Садовников, XI кылаас үөрэнээччитэ, Марик Зырянов, Саша Томский, X кылаас үөрэнээччилэрэ, Арина Старостина, VIII кылаас үөрэнээччитэ иннилэрин кимҥэ да биэрбэтилэр.
Бу сайыҥҥы күннэргэ хас биирдии оҕо дьарыктаах сылдьар. «Эйгэ» лааҕырбыт үлэтин ситиһиилээхтик түмүктээтэ. Дьиэ кэргэнинэн үлэ лааҕырдара уонна «Уолан» оскуола иһинэн үлэ лааҕыра үлэлииллэр. Билигин сайыҥҥы биир күнү былдьаһан окко киириэхтэрэ.
Эльдар Садовников, XI кылаас, Абый, Сыаҥааннаах,
«Элгэс эрэллэрэ» эдкорпост.