Хас биирдии киһиэхэ «мин ким буолабыный?», «ханнык идэни талабыный?» диэн ыйытыылар кэлэллэр. Ол курдук, мин эмиэ үөрэхпин бүтэрэн, бу күннэргэ Хотугулуу-Илиҥҥи федеральнай университет суруналыыстыка салаатыгар докумуоннарбын туттардым. Сөбүлүүр хайысхабын таларбар «Кэскил» оҕо бэчээтин кыһатыгар кэрэспэдьиэннээбитим улахан оруолу оонньоото.
Бастаан 6 кылааска үөрэнэ сылдьан Н.И. Протопопова аатынан «Кэскил» оҕо дьоҕурун сайыннарар киинигэр кэрэспэдьиэн быһыытынан киирбитим. Салгыы «Кэскил» хаһыакка, «Бэлэм буол» сурунаалга суруйан, күрэхтэргэ кыттыбытым. Норуоттар икки ардыларынааҕы иккис интеллектуальнай оонньууларын эдэр кэрэспэдьиэннэри кытары сырдаппытым. Бу тэрээһиҥҥэ сылдьан уопут бөҕө эбиммитим, 10 күн олус таһаарыылаахтык уонна интэриэһинэйдик ааспыта.
Суруналыыстыка эйгэтигэр киирэн, дьону кытта түөргэнник уопсай тыл булар, матырыйаал суруйар, камеранан сатаан устар, түһэрэр буоллум, элбэх интэриэһинэй, үчүгэй дьону кытта билсистим, алтыстым. Ылбыт үөрүйэхтэрим устудьуоннуурбар, үлэлиирбэр көмөлөһүөхтэрэ диэн бигэ эрэллээхпин. «Кэскил» оҕо бэчээтин кыһатын үлэһиттэригэр уонна салайааччыбар Кыдана Владимировна Дорофееваҕа улахан махталбын тиэрдэбин.
Руслана Анисимова,
Н.С. Степанов аатынан Бүлүүтээҕи 3 №-дээх орто оскуола выпускнига.