Быйыл суруналыыс, бэчээт туйгуна Иван Ущницкай «Бэлэм буол» хаһыакка 1977 сыллаахха бэчээттэниититтэн өрөспүүбүлүкэ хаһыаттарыгар тахсыбыта 45 сылын туолла. Оччотооҕу 9 кылаас үөрэнээччитэ Ваня Ущницкай бастакы суруйууларыттан да көрдөххө, кини оҕо сааһыттан бэйэтин суруйууларыгар тыа сиригэр баар кыһалҕаны таарыйар.
Тыа сиригэр спортсаала, тренер суох кыһалҕатын аан маҥнайгы ыстатыйатыгар ыйар. Онтон ити суруйбут дьоруойа улахан дьоҥҥо ССРС спордун маастара, САССР, Киргизия, Бүтүн Сойуустааҕы (билиҥҥинэн Аан дойдутааҕы) турнирдар кыайыылаахтара буолбута.
Ити сыл «Аны быраааттыы Константиновтар» диэн очеркатын «Эдэр коммунист» хаһыакка ыыппытын Егор Неймохов таба көрөн, балаһа толору кэриэтэ таһааттарбыта. Онтон Киев устудьуонун, ССРС хас да төгүллээх призера М. Ноговицын туһунан репортажтарга кыайда-хотто, миэстэлэстэ эрэ диэн ааҕар кэмнэригэр суруйсубутуттан, заметкатын «Кыымҥа», «Молодежь Якутии» ыыппытын И. Кычкин, В. Степанов таба көрөн бэчээттэтэллэр.
Өссө биир «Бухатыырдар дойдуларыгар Дүпсүҥҥэ» матырыйаалын суруйааччы Николай Босиков «Эдэр коммунист» хаһыакка таһаараары олордохторуна көрөн, дойдубун бэрткэ суруйбут диэн үөрбүтэ. Эмиэ оччотооҕу оҕо туруорсуута: спортсаала туттахтарына, тренер көрүлүннэҕинэ, урукку курдук күүстээхтэр, маастардар үөскүөхтэрэ диэн таһаарбыта.
Иван Ущницкай аан бастакы үлэлэрин, оскуолаҕа үлэтинэн кэлэ сылдьан, Н.И. Протопопова бэлиэтии көрөн талбыта.
Эрэдээксийэбит аатыттан Иван Петровиһы айар үлэтэ бэлиэ сылынан эҕэрдэлиибит!
keskil14.ru