Сунтаар үһүс ньүөмэрдээх орто оскуолатыгар 2011 сылтан «Аптаах холбуйа» диэн куукула театра — куруһуок аһыллыбыта. Мин, Сергеева Капиталина Михайловна, технология учуутала — бырайыак автора буолабын. Үөрэнээччини сайыннарар, тылын-өһүн байытар уонна норуот остуоруйаларын, өс хоһооннорун билиһиннэрэр сыаллаах үлэ саҕаламмыта.
Оҕолор үөрэ-көтө куруһуокпар кэлбиттэрэ. Икки группаҕа хайдан, Саввина Мария Петровна өс хоһооно-өбүгэ номоҕо инсценировкатынан “Эриэппэ” уонна “Киһиргэс куобах” остуоруйалары туруорарга санаммыппыт. Оскуолабыт мастерскойугар тутан-хабан, хамсыыр-имсиир дьэрэкээн куукулалары оҥорон саҕалаабыппыт. Оҕолор артыыстыырга, сөпкө саҥарарга үөрэммиттэрэ. Бастаан Сунтаар начальнай оскуолатыгар, улуустааҕы библиотекаҕа уонна уһуйааннарга көрдөрбүппүт. Ытыс тыаһынан доҕуһуоллаан көрөөччүлэр наһаа сэҥээрбиттэрэ, астыммыттара. Онтон ыла санаабыт көтөҕүллэн конкурстарга кыттыбыппыт:
2013 сылга Түбэй Дьаархаҥҥа буолбут Республиканскай “Синяя Птица” диэн фестивальга кыттан, приз жюри портативнай проигрыватель ылбыппыт.
2015 сылга Дьокуускайга буолбут XIX Республиканскай “Синяя птица” фестивальга Сиэн Чолбодук “Таал-таал уонна киһи-киһичээн” остуоруйа пьесаны кылгатан туруорбуппут. Кыратык айаммыт туһунан ахтан ылыам. Сунтаартан хоҥнорбутугар Кулун тутарга күүстээх самыыр түспүтэ уонна түүн суолбутун муус-килэгир гына тоҥорон кэбиспитэ. Суолга массыына бөҕөтө саахалламмыт этилэр. Биһиги этэҥҥэ куораты булбуппут. Дьокуускай куорат уулуссалара килэгир мууһунан көрсүбүтэ. Халтырыйыы туһунан остуоруйа пьесабытын көрдөрөн сыаналаах приз, номинация “Лучший кукольный спектакль” уонна кубок ылан үөрэн-көтөн дойдубутугар төҥнүбүппүт.
2020 сыллаахха “Синяя птица” XXIV республиканскай заочнай фестивальга Братья Грим «Бременские музыканты» уонна Саввина Мария Петровна “Куобах дьиэтэ” диэн куукольнай остуоруйалары устан ыыпыппыт. “Кукольный мир” номинация уонна кубок хаһаайыннара буолбуппут.
2021 сылга Тимофей Сметанин 100 сылыгар анаан “Күөрэгэй” куукула испэктээги XXV республиканскай заочнай фестивальга кыттан “Лучший кукольный спектакль” номинация, кубок ылбыппыт.
Махтанабын төрөппүттэргэ, «Олоҥхо» дьиэтин режиссеругар Заровняева Татьяна Никитичнаҕа, начальнай кылаас учууталларыгар Потапова Наталья Михайловнаҕа, Кушатова Фаина Юрьевнаҕа, Лукина Ирина Николаевнаҕа, Иванова Саргылаана Моисеевнаҕа уонна оператор Ярослав Филипповка.
Капиталина Сергеева