Иркутскай уобалас Ангарск куоратыгар нуучча дуобатыгар оҕолорго Сибиир федеральнай уокуругар биирдиилээн бастыыр иһин күрэс уонна Уһук Илин федеральнай уокурук чөмпүйэнээтэ буолан ааста. Бу улахан түһүлгэҕэ Сунтаар улууһун эдэр дуобаччыттарын дэлэгээссийэтэ ситиһиилээхтик кыттан кэллилэр.
Дэлэгээссийэҕэ Н.М. Родионова аатынан Сунтаардааҕы оҕо дьоҕурун сайыннарар киин эбии үөрэхтээһин педагога, тренер Ньургун Непомнящий, «Дебют» дуобат кулуубун үөрэнээччилэрэ: Тимур Уаров, Нина Иванова, Артем Пышняк, Айхал Борисов, Нарыйа Иванова, Амелия Тимофеева уонна төрөппүттэр Ульяна Жиркова, Наталия Морозова бааллар.
Россия дуобакка федерациятын бэрэсидьиэнэ Анатолий Никитин ыҥырыы суругар этиллэринэн, нуучча дуобатыгар оҕолорго Сибиир федеральнай уокуругар биирдиилээн бастыыр иһин уонна Уһук Илин федеральнай уокуругун чөмпүйэнээтэ дуобаты таптааччылар улахан бырааһынньыктара ыччаттарга, оҕолорго алта бөлөҕүнэн уонна улахан дьоҥҥо эр дьон, дьахталлар диэн арахсан ыытылынна.
Күрэс туһунан дуобат тренерэ Ньургун Степанович Непомнящий бу курдук кэпсиир:
— Бу күрэскэ Саха сириттэн биһигини сэргэ Ньурбаттан, Үөһээ-Бүлүүттэн, Хаҥаластан уонна Дьокуускай куораттан күүстээх дуобатчыттар кытыннылар. Дуобатчыттар Ангарск куоракка «Звездный» парк-отельга хонон-өрөөн, сынньанан баран үрдүгэр баар спортивнай комплекска нэдиэлэ устата алта бөлөҕүнэн үс программаҕа күрэстэстилэр. Киэһэ өттүгэр катокка хатыыскалаан, маҕаһыыннарга сылдьан, Байкал күөл устун чэбдик салгыҥҥа күүлэйдээн, кыһыҥҥы айылҕаны кытта алтыһан дуоһуйа сынньанныбыт. Айаммытыгар Мииринэйгэ дылы барар-кэлэр массыынанан хааччыйбыт улуус дуобакка федерациятын салайааччытыгар Борис Серафимовичка, төрөппүттэргэ, Сунтаардааҕы гимназия директорыгар, суоппарыгар махталбыт улахан.
Улахан эрийсиилээх күрэс кэнниттэн түмүк маннык буолла:
Молниеноснай программаҕа:
(14 саастарыгар диэри уолаттарга)
Уаров Тимур — 2 миэстэ
(9 саастарыгар диэри уолаттарга)
Борисов Айхал — 1 миэстэ
Пышняк Артем — 2 миэстэ
түргэн программаҕа
(14 саастарыгар диэри уолаттарга)
Уаров Тимур — 2 миэстэ
(9 саастарыгар диэри уолаттарга)
Пышняк Артем — 3 миэстэ
Борисов Айхал — 2 миэстэ
(9 саастарыгар диэри кыргыттарга)
Иванова Нарыйа — 2 миэстэ
Классическай программаҕа
(14 саастарыгар диэри уолаттарга)
Уаров Тимур — 2 миэстэ
(9 саастарыгар диэри уолаттарга)
Пышняк Артем — 3 миэстэ
Борисов Айхал — 2 миэстэ
(9 саастарыгар диэри кыргыттарга)
Иванова Нарыйа — 2 миэстэ.
Оҕолорбут дуобат улахан түһүлгэтиттэн 11 мэтээллээх, кыайыы-хотуу көтөллөөх үөрэн-көтөн кэлээт, Сунтаар улууһун дуобакка бэдэрээссийэтигэр отчуоттуур, ситиһиилэрин кэпсиир, үөрүүлэрин үллэстэр үтүө-мааны түгэн тэрилиннэ. Бэдэрээссийэ бэрэссэдээтэлэ улуус баһылыгын үпкэ уонна экономикаҕа солбуйааччыта Борис Серафимович Васильев эдэр дуобатчыттары ситиһиилэринэн эҕэрдэлээтэ, тобуллаҕас толкуйу, тулууру, дьулууру эрэйэр өй оонньуутугар дьаныардаахтык дьарыктаныҥ диэн ыҥырда.
Айна Яковлева, Сунтаар улууһа.
Кэскил14.ру