Быйылгы үөрэх сылыгар, Сунтаар 1 нүөмэрдээх оскуолатыгар, 10 кылааска педагогическай хайысхалаах кылаас аһыллыбыта. Кылаас салайааччыта география учуутала Аксиния Анатольевна Семенова.
Барыта 19 оҕо үөрэнэр. Үөрэнээччилэр индвидуальнай бырайыак чэрчитинэн, уонна «Тэтим» диэн оскуола волонтерскай хамсааһынын сөргүтэр сыалтан, 1 чиэппэр устата оскуола, нэһилиэк араас тэрээһиннэргэ көхтөөхтүк кытыннылар. Бу оскуолабытын бүтэрбит, улуус, республика киэн туттар киһитигэр Иван Афанасьевич Матвеевка анаммыт скверга венок уурааһыныгар, Сунтаар улууһун күнүгэр флешмобка кытыннылар.
Уонна быстах хомуурга барбыт аҕалаах дьиэ кэргэттэргэ, Пуховтарга, Егоровтарга, хас да кырдьаҕас ыалга мас хайытыытыгар көмөлөстүлэр.
Күһүҥҥү өрөбүллэр күннэригэр даҕаны мээнэ олорбоппут, өссө да көмөлөһөр ыалбыт.
Сунтаар бастакы нүөмэрдээх орто оскуолатын медиа-киин эдкордара