Сунтаар 1 №-дээх оскуолатын үөрэнээччилэрэ дойду Бэрэсидьиэнигэр Владимир Путиҥҥа туһаайан көрдөһүү этии оҥордулар. Ол курдук, анал байыаннай дьайыыга сылдьан сырдык тыына быстыбыт, биһиги биир дойдулаахпыт, «Сунтар» диэн позывнойдаах Иван Петрович Иванов дьоруойдуу быһыытыгар сөптөөх наҕарааданы Арассыыйа Дьоруойа ааты иҥэрэри туруорустулар.
Санатан ааһар буоллахха, Иван Иванов Угледар куораты ылыыга суолталаах дьайыыны оҥорон, 115 миэтэрэ үрдүктээх башняны эстэрэн, сири кытта тэҥнээбитэ. Кини хорсун быһыытын туһунан «Сулуһа суох дьоруой» диэн «Сунтаар сонуннара» суруйбут матырыйаалыгар ааҕыҥ: https://сунтаарсонуннара.рф/suluһa-suoh-doruoj-ivan-ivanov/
Ити эрээри, харса-хабара суох хорсун быһыы күн баччаҕа диэри үрдүк наҕараадаҕа ситэ сыаналаммакка сылдьара кыһыылаах, абалаах… Иван Иванов-«Сунтар» Сунтаар 1№-дээх оскуолатын бүтэрэн баран аармыйа кэккэтигэр ситиһиилээхтик сулууспалаабыта. Кинини бииргэ үөрэммит доҕотторо олус сэмэй, үтүө санаалаах, эт-хаан өттүнэн олус кыайыгас-хотугас этэ диэн ахталлар. Билигин бу оскуолаҕа Иван кыргыттара Диана уонна Лиза үөрэнэ сылдьаллар. Кыргыттар аҕаларынан киэн тутталлар, ахталлар, суохтууллар…
Дойду Бэрэсидьиэнигэр Владимир Путиҥҥа көрдөһүү этиини бу оскуола 8 кылааһын үөрэнээччитэ Милан Алексеев оҥордо. “Сулуһа суох дьоруойу” Иван Иванову үөрэммит оскуолата умнубат.
Оҕолор бу устууларын дойду Бэрэсидьиэнэ Владимир Путин быһа эфиригэр ыыттылар. Ону тэҥэ, хас биирдии Сунтаар олохтооҕо быһа эфир аадырыһыгар Иван Ивановка Дьоруой үрдүк аатын иҥэрэр туһунан этиилэрин эмиэ ыыттылар.
Ира АФАНАСЬЕВА, Сунтаардааҕы ПТЛИ 11-с кылааһын үөрэнээччитэ.
keskil14.ru