Волейбол – Саха сиригэр саамай маассабай уонна дьон сөбүлүүр спортивнай оонньуу көрүҥэ. Мээчик үөһээ кыырайан, оонньооччулар тоһуйар илиилэрэ күөрэҥнээн, өрө ыстанан тахсан саайан. Ол тухары хаһыы-ыһыы сааланы толорор. Дьэ, бу курдук умсугутуулаах волейбол оонньуута.
Ньурба оройуонугар бу оонньууну эмиэ олус сөбүлүүллэр уонна дьарыктаналлар. Бу ааспыт ый бүтэһик күннэригэр Ньурба куоратын саалалаларыгар волейбол сезонун арыйыы күрэхтэһиилэрэ буолан аастылар. Маҥнайгы күн улахан дьоннор – дьахтар, эр дьон хамаандаларыгар арахсан, көхтөөхтүк оонньоон, быйылгы саҕалааһын үчүгэй буолла.
Иккис күн оскуола оҕолоро сезону арыйар күрэхтэһиилэрэ ыытылынна. Манна биһиги, Николай Кочнев аатынан Хаҥалас орто оскуолатыттан икки хамаандабытынан кыттыыны ыллыбыт. Барыта оройуонтан 23 хамаанда оонньуу кэлбит. Маалыкай эҥэр оскуолалар хаайтаран олорор буолан суохтар. Күрэхтэһиибит уолаттарга, кыргыттарга атын атын заалынан арахсан олус тыҥааһыннаахтык ааста. Киирсиилэр сытыы буоллулар.
Биһиги оскуолабытыгар киэһээ аайы волейболга дьарыктанар, уонна да олус сөбүлүүр көрүҥмүт буолан үөрэ-көтө кытынныбыт. Түмүгэ үчүгэй. Ол курдук кыргыттарга 14 хамаандаттан 3 миэстэни ылары ситистибит. Уолаттарбыт хамаандата 9 оскуолаттан 1 бочуоттаах миэстэҕэ тигистилэр. Уопсай түмүккэ биһиги маҥнайгы буоллубут. Онон сырабыт, дьарыкпыт таах хаалбата, барыта туһалаата. Кыргыттар аныгыскы сырыыга 1 миэстэҕэ тахсыахпыт диэн эрэллээхпит.
Дьон- сэргэ, ордук оҕолор, спорт араас көрүҥнэринэн дьарыктаналлар олус хайҕаллаах дьыала. Онтон волейбол көрүҥэ саамай өйдөнүмтүө, чэпчэки. Волейболу оонньооҥ, чэгиэн туруктаах буолуҥ!
Эвелина Жданова,
VIII кылаас,
«Ыллык» пост, Хаҥалас,
Ньурба