Мин «Кэскил» медиа оскуола юнкора буоларбынан киэн туттабын. Оскуолабар, нэһилиэкпэр буолар тэрээһиннэргэ кыттабын, ол кэнниттэн ырытан, толкуйдаан «Кэкилгэ» суруйан ыытабын.
#кэскиллээхолоххобэлэмбуол диэн биһиги медиа оскуолабыт сүрүн девиһэ сүрдээх дириҥ ис хоһоонноох. Соторутааҕыта Төҥөлүттэн Аллараа Бэстээххэ волейбол күрэҕэр кытта айаннаан иһэммин, киһи кэскиллээх олоххо бэлэм буолара чөл олохтон, доруобуйаттан саҕаланар дии санаатым.
Биһиги бу күрэхтэһиигэ уопсайа 16 оҕо буоламмыт автобуһунан айаннаан тиийбиппит. Павловскай, Майа уонна Аллараа Бэстээх хамаандалара кэлбиттэр этэ.
Волейболга хамаандаҕа 6 киһи оонньуур. Биһиги хамаандабытыгар Данил Назаров, Егор Попов, Денис Сотников Айсен Федотов, Сема Иванов, Сайаан Борисов, Максим Пермяков уонна мин баарбыт. Хамаанда хас биирдии оонньооччута күүстээх өрүттээх, сатабыллаах. Холобур, мин хамаанданы сибэстиир оруоллаахпын, мээчиги туруоран биэрэбин, кинилэр ону быһаллар. Данил Назаров уонна Егор Попов подачаларыгар олус күүстээхтэр. Оонньуу тухары бэйэ-бэйэбитигэр көмөлөһөбүт, өйөбүл буолабыт. Биир тыыҥҥа, биир ситимҥэ үлэлиибит.
Тренербит Дария Дмитриевна Апросимова элбэххэ үөрэтэр, бэйэтин билиититтэн бэрсэр, сүбэлиир. Волейбол ис хоһоонун арыйан кэпсиир. Бастаан Төҥүлүгэ кэлэрбэр олох сатаабат этим. Онтон Дария Дмитриевна салайар секциятыгар киирэммин, волейболу сатыыр буоллум. Онон тренербин кэскиллээх олоххо бэлэмниир киһим диэн ааттыыбын.
Гаврил ПРОКОПЬЕВ, VII кылаас, Төҥүлү, Мэҥэ Хаҥалас